वाशिम : आयपीएल क्रिकेटच्या सामन्यावर सट्टा लावून हारजीतचा जुगार खेळणाऱ्या दोघांना स्थानिक गुन्हे शाखेने अटक करीत त्यांच्याकडून ७१ हजारांचा ऐवज मंगळवारी जप्त केला. ही कारवाई अनसिंग (ता.वाशिम) येथील बसस्थानक चौक व माळी वेटाळ परिसरात करण्यात आली.
अनसिंग येथील बसस्थानक चौक व माळी वेटाळ या दोन ठिकाणी काही व्यक्ती मोबाईल फोनच्या साहाय्याने आयपीएल क्रिकेटमधील आरसीबी विरुद्ध एलएसजी या दोन संघादरम्यानच्या सामन्यावर लोकांकडून क्रिकेट सामन्यामधील प्रत्येक रन, बॉलिंग व बॅटिंग यावर पैसे लावून घेऊन हार जीतचा सट्टा लावत आहेत, अशा गुप्त माहितीच्या आधारे स्थानिक गुन्हे शाखेच्या पथकाने पंचासह अनसिंग येथील बसस्थानक चौक येथे छापा टाकला. यावेळी मोबाईल फोन व टीव्ही संच अशा ३१ हजारांच्या सट्टा साहित्य मुद्देमालासह एक आरोपी ताब्यात घेतला. तसेच अनसिंग येथीलच माळी वेटाळ येथे छापा टाकला असता मोबाईल फोन व टीव्ही संच असे ४० हजारांच्या सट्टा साहित्यासह आरोपीस ताब्यात घेते. दोन्ही ठिकाणी मिळून एकूण ७१ हजाराच्या मुद्देमालासह दोन आरोपींना ताब्यात घेण्यात आले.