शिरपूर जैन : पांगरखेडा येथे जालना जिल्ह्यातील गणेश बोराडे यांच्या जवळील सोळा लाख रुपये लुटल्याची घटना १५ सप्टेंबर रोजी घडली होती. या प्रकरणात पोलीस कोठडीत असलेल्या विजेंद्र चव्हाण या आरोपीकडून रोख अडीच लाख रुपयांचा मुद्देमाल पोलिसांनी बुधवारी हस्तगत केला. या प्रकरणातील साडेतेरा लाख रुपयांचा मुद्देमाल येऊन फरार असलेल्या तीन आरोपींचा शोध पोलीस घेत आहेत.
१५ सप्टेंबर रोजी जालना जिल्ह्यातील बोद्री येथील गणेश बोराडे यांना पोकलेन मशीन विकत घेण्यासाठी आरोपींनी पांगरखेडा येथे बोलविले. तेथे आल्यानंतर आरोपींनी त्यांना चाकूचा धाक दाखवून त्यांच्या गाडीत ठेवलेले सोळा लाख रुपये व मोबाइल जबरीने लुटला. याप्रकरणी १७ सप्टेंबर रोजी दाखल तक्रारीवरून पोलिसांनी सहा जणांविरुद्ध गुन्हा दाखल करून नरेंद्र गयानू चव्हाणश विजेंद्र नरेंद्र चव्हाण व एका अल्पवयीन आरोपीस ताब्यात घेतले. नरेंद्र चव्हाण, विजेंद्र चव्हाण या आरोपींना पोलीस कोठडी मिळाली. दरम्यान, नव्याने जिल्ह्यात दाखल झालेले पोलीस अधीक्षक बच्चन सिंग, उपविभागीय पोलीस अधिकारी यशवंत केडगे यांच्या मार्गदर्शनात शिरपूर पोलीस स्टेशनचे पोलीस निरीक्षक सुनील वानखडे, तपास अधिकारी सहायक पोलीस निरीक्षक जगदीश बांगर, पोलीस उपनिरीक्षक शरद साठे, सहायक पोलीस उपनिरीक्षक प्रकाश सरनाईक व चमूने आरोपी विजेंद्र याच्याकडून अडीच लाख रुपये रोख व वीस हजार रुपयांचा मोबाइल व एक चाकू जप्त केला.
.......
बुलडाणा जिल्ह्यातून पथक खाली हात परतले
फरार आरोपी बादल शिका चव्हाण, नरेंद्र गयानू चव्हाण व एक अनोळखी आरोपी यांच्या शोधार्थ एक पोलीस पथक बुलडणा जिल्ह्यात रवाना झाले होते. मात्र, आरोपी मिळून न आल्याने पोलिसांना खाली हात परतावे लागले. घटनेतील तीन आरोपी साडेतेरा लाख रुपये घेऊन अद्यापही फरारच आहेत. फरार आरोपींना लवकरच अटक केली जाईल, असे पोलीस निरीक्षक सुनील वानखडे यांनी सांगितले.