शिरपूर येथील जानगीर महाराज संस्थानकडे जाणाऱ्या मुख्य रस्त्यावर एका ठिकाणी चिखल झाला आहे. यामुळे करंजी, वाशिम, शेलगाव बगाडेकडे जाणाऱ्या लोकांना त्रास सहन करावा लागत आहे. इतर ठिकाणचे अंतर्गत रस्तेही खराब झाल्याने सर्वच स्तरातून संताप व्यक्त होत आहे.
बसथांबा ते जैन मंदिर रस्ता, जगदंबा देवी मंदिराकडे जाणारा रस्ता, प्रामुख्याने जानगीर महाराज संस्थानकडे जाणाऱ्या रस्त्यावर फरशी पुलालगतचा रस्ता खराब होऊन खळगे निर्माण झाले आहे. सध्या तेथे मोठ्या प्रमाणात चिखलयुक्त पाणी साचले आहे. त्यामुळे परिसरातील सर्वधर्मीयांचे श्रद्धास्थान असलेल्या जानगीर महाराज संस्थानकडे जाणाऱ्या लोकांसह करंजी, वाशिम, शेलगाव बोंदाडे व परिसरातील शेतात जाव्या लागणाऱ्या शेतकऱ्यांना मोठा त्रास होत आहे. रस्त्यांची तत्काळ दुरुस्ती करावी, अशी मागणी राम देशमुख यांनी केली आहे.