वाशिम : पीककर्ज पुनर्गठनाची मुदत संपण्यास अवघे सहा दिवस शिल्लक असताना, अद्यापही ३0 टक्के पीककर्जाचे पुनर्गठण होणे बाकी आहे. सहा दिवसात पीककर्ज पुनर्गठनाचा आकडा पूर्ण करण्याची कसरत जिल्हा प्रशासनाला करावी लागणार आहे. दुसरीकडे पीककर्ज रुपांतरण समाधानकारक होत आहे. २0१४-१५ या आर्थिक वर्षातील पीककर्जाचे पुनर्गठण करण्याचे निर्देश मुख्यमंत्री देवेंद्र फडणवीस यांनी दिलेले आहेत; मात्र या निर्देशांची अंमलबजावणी योग्य प्रकारे वाशिम जिल्ह्यात होत नसल्याची परिस्थिती आहे. २0१४-१५ या आर्थिक वर्षात जिल्ह्यातील ९९ हजार १९४ शेतकरी सभासदांनी एकूण ६६३ कोटी ९८ लाख रुपयांच्या पीककर्जाचा लाभ घेतला होता. या शेतकर्‍यांना पीककर्ज पुनर्गठनाचा लाभ देण्याचे स्पष्ट निर्देश शासनाचे आहेत. पुनर्गठनास नकार देणार्‍या बँक प्रशासनाविरूद्ध एफआयआर दाखल करण्याचे आदेश विभागीय आयुक्त ज्ञानेश्‍वर राजुरकर व जिल्हाधिकारी राहुल द्विवेदी यांनी दिलेले आहेत. १५ जुलैपर्यंंत पुनर्गठन केले जाणार आहे. ६ जुलैपर्यंंत विविध राष्ट्रीयीकृत बँकांनी २९ हजार १२६ शेतकरी लाभार्थींना १७६.३८ कोटी रुपयांच्या कर्जाचे पुनर्गठन करण्यात आले आहे. बँक ऑफ बडोदाने १५८ शेतकर्‍यांचे १८.६ लाख, बँक ऑफ महाराष्ट्राने १९५ शेतकर्‍यांचे १८.७ लाख, सेंट्रल बँक ऑफ इंडियाने ७४९ शेतकर्‍यांचे ५५.९ लाख, स्टेट बँक ऑफ इंडियाने २११२ शेतकर्‍यांचे १.८६ कोटी, युनियन बँक ऑफ इंडियाने ३८६ शेतकर्‍यांचे २९ लाख, एसडीएफसी बँकेने २१२ शेतकर्‍यांचे ३७.४ लाख, डीसीसी बँकेने २0 हजार ३६८ शेतकर्‍यांचे १0९ कोटी रुपयांच्या पीककर्जाचे पुनर्गठण, अशी आकडेवारी आहे. दरम्यान कर्ज रुपांतरणाचा आकडा १६९ कोटींवर गेला आहे. १७ हजार ७0४ शेतकर्‍यांनी कर्ज रुपांतरणाचा लाभ घेतला आहे. दरम्यान, वाशिम जिल्ह्यातील सर्व राष्ट्रीयीकृत, खासगी, विदर्भ-कोकण ग्रामीण बँकांमध्ये सन २0१४-१५ च्या पीक कर्ज पुनर्गठनाची प्रक्रिया १५ जुलै २0१५ पर्यंत सुरु राहणार आहे. तसेच सेवा सहकारी संस्थांमार्फत शेतकर्‍यांनी घेतलेल्या पीक कर्जाच्या रुपांतरणबाबत रिझर्व्ह बँक व नाबार्ड कडून मार्गदर्शक सूचना निर्गमित करण्यात आल्या आहेत, अशी माहिती जिल्हा उपनिबंधक ज्ञानेश्‍वर खाडे यांनी दिली.
प्रशासनासमोर पीककर्ज पुनर्गठनाची कसरत!
By admin | Updated: July 10, 2015 01:23 IST