वाशिम - बोगस आधारकार्डद्वारे वाशिम जिल्ह्यातील रहिवाशी दाखवून ऑफलाईन पद्धतीने बोगस अपंग प्रमाणपत्राद्वारे २००९ मध्ये पांढरकवडा नगर परिषद शाळेत नोकरी मिळविणाऱ्या बोगस शिक्षिकेचा मयूर मेश्राम (जि.अमरावती) या उपसरपंचाच्या तक्रारीने भंडाफोड केला. फेरपडताळणीअंती बोगसपणा चव्हाट्यावर आल्याने बुधवारी वाशिम शहर पोलीस स्टेशनमध्ये सोनल प्रकाश गावंडे रा. मंगलमुर्ती नगर, वडगाव, यवतमाळ या बोगस शिक्षिकेसह तिघांवर विविध कलमान्वये गुन्हा दाखल करण्यात आला.
यवतमाळ जिल्हयातील रहिवाशी सोनल प्रकाश गावंडे या पांढरकवडा नगर परिषदेच्या शाळेमध्ये शिक्षिका म्हणून कार्यरत आहे. अपंग नसतानादेखील अपंग अनुशेष भरतीमधून २००९ मध्ये नियुक्ती मिळविली असून अपंगत्वाची फेरपडताळणी करावी अशी फिर्यादी मयुर सदानंद मेश्राम (३५) उपसरपंच रा. हिवरा (बु), (ता. नांदगाव खंडे, जि. अमरावती) यांनी शिक्षण विभागाकडे दिली होती. त्या अनुषंगाने फेरपडताळणीचे आदेश दिल्याने सोनल गावंडे यांनी वाशिम जिल्हा सामान्य रूग्णालयामध्ये २ सप्टेंबर २०२२ रोजी अपंग यु.डी.आय.डी. ऑनलाईन अर्ज दाखल केला. त्या अर्जासोबत ऑफलाईनचे बोगस अपंग प्रमाणपत्र, बोगस आधारकार्डच्या आधारे वाशिम जिल्हयातील रहिवाशी दाखविले आणि त्या आधारे ऑनलाईनचे बोगस यु.डी.आय.डी. प्रमाणपत्र संबंधित विभागाला सादर केले. रूग्णालयामार्फत प्रमाणपत्रांची पडताळणी केली असता सर्व कागदपत्र बोगस आढळून आले. यासंदर्भात जिल्हा रूग्णालयाने लेखी पत्राद्वारे वाशिम शहर पोलीस स्टेशनला कळविले. याप्रकरणात नगर परिषदेच्या शिक्षण विभागातील अतुल वानखडे रा. तपानवाडी, यवतमाळ व राजश्री शाहू महाराज प्राथमिक शाळा, पांढरकवडा येथील शिक्षक नहुष ज्ञानेश्वर दरवेशवार रा. सत्यनारायण लेआऊट वडगाव, यवतमाळ हे सुध्दा सहभागी असल्याचे फिर्यादीत नमूद आहे. यावरून तिन्ही आरोपीविरूद्ध भादंवी कलम ४२०, ४६७, ४६८, ४७१, ३४ नुसार गुन्हा दाखल करण्यात आला. घटनेचा पुढील तपास परिविक्षाधिन पोलीस उपनिरीक्षक सचिन गोखले करीत आहेत.
यवतमाळातील आरोपी, वाशिममधून प्रमाणपत्र अन् अमरावतीतून तक्रार
बोगस अपंग प्रमाणपत्राद्वारे शिक्षिकेची नोकरी मिळविणारी आरोपी यवतमाळ जिल्ह्यातील आहे. बोगस आधारकार्डद्वारे वाशिम जिल्ह्यातील रहिवाशी दाखवून आरोपी शिक्षिकेने वाशिम जिल्हा सामान्य रुग्णालयातून बोगस प्रमाणपत्र काढले आणि या प्रकरणाची तक्रार अमरावती जिल्ह्यातील हिवरा बु. च्या उपसरपंचांनी केली. या तक्रारीच्या अनुषंगाने फेरपडताळणी केल्यानंतरच या संपूर्ण प्रकरणाचा भांडाफोड झाला.