शस्त्राचा धाक दाखवून लाखोंचा ऐवज लंपास

एकाच रात्री मालेगाव येथे जबरी चोरीच्या दोन घटना.

मालेगाव(जि. वाशिम), दि १0 : शस्त्राचा धाक दाखवून अज्ञात चोरट्यांनी लाखो रुपयांचा ऐवज लंपास केल्याच्या दोन घटना मालेगाव शहरात मंगळवारच्या रात्रीदरम्यान घडल्या. शेलु फाट्यावरील शर्मा यांच्या राहत्या घरी व शासकीय विश्रामगृह येथे चोरट्यांनी धुमाकूळ घातल्याने शहरात दहशतीचे वातावरण पसरले आहे. स्थानिक संताजी नगर येथे राहत असलेले श्रीकिसन शर्मा यांच्या घरात घुसून लहान मुलाच्या गळ्यावर धारदार शस्त्र ठेवून घरातील किंमती साहित्य लंपास केले. रोख व सोन्या-चांदीचे दागीने असा एक ते दीड लाख रुपयाचा ऐवज चोरून नेल्याची फिर्याद देण्यात आली. तेथुन जवळच असलेल्या शासकीय विश्रामगृहाच्या निवासस्थानात राहत असलेले दिनकर गोडेवार यांच्या घरात घुसून गोडेवार यांना लोखंडी काठीने मारहाण करण्यात आली आणि रोख १४ हजार ६00 रोख व सोन्या-चांदीचे दागीने सह ५७ हजार १00 रूपयांचा ऐवज लंपास केला. या घटनेची फिर्याद दीनकर गोडेवार व श्रीकीसन शर्मा यांनी दिल्यावरून मालेगाव पोलिसांनी अज्ञात चोरट्याविरूध भादंवी कलम ३९४, ३९५, नुसार गुन्ह्याची नोंद केली. पुढील तपास मालेगाव पोलीस करीत आहेत.