मंगरूळपीर येथे तैलचित्र प्रदर्शन उत्साहात

मान्यवरांच्या हस्ते दीपप्रज्वलन करून तैलचित्र प्रदर्शनाचे उद्घाटन करण्यात आले. शहरात प्रथमच असे प्रदर्शन झाले असून या चित्र दर्शन कार्यक्रमाच्या अध्यक्षस्थानी जि. प. अध्यक्ष चंद्रकांत ठाकरे, तर प्रमुख पाहुणे म्हणून माजी नगराध्यक्ष तथा नगरसेवक अशोक परळीकर, नगरसेवक पुरुषोत्तम चितलांगे, मदनलाल लोहिया, सुप्रसिद्ध चित्रकार मिनल झवर, (लोहिया) आदी मान्यवर उपस्थित होते. चंद्रकांत ठाकरे म्हणाले, अलीकडे करिअर करण्यासाठी अनेक क्षेत्र खुले असताना पालक आपल्या पाल्यांची आवड लक्षात न घेता एका ठरावीक क्षेत्रात प्रगती करण्यासाठी प्रोत्साहित करतात, ही बाब पाल्याच्या इच्छेविरुद्ध होत असल्याने ठरवून दिलेल्या क्षेत्रात यश संपादन करण्याची शास्वती नसते त्यामुळे पालकांनी पाल्याच्या आवडीवर भर द्यावा, असे आवाहन त्यांनी केले. या कार्यक्रमाचे आयोजन ड्रीम्स वर्कस आर्ट स्टुडिओ चित्रकला प्रदर्शन पोट्रेटस प्रदर्शन यांनी केले होते. या चित्र प्रदर्शनामध्ये हाताने रेखाटलेली विविध विषयावरील अप्रतिम चित्र ठेवण्यात आले होते. कार्यक्रमाच्या यशस्वीतेसाठी विनोद परळीकर, सुमित जोशी, उमेश नावधर, पिंटू घाटे आदींनी पुढाकार घेतला होता. कार्यक्रमाचे संचालन बकटलाल लोहिया, तर आभार महेश लोहिया यांनी मानले.