नायब तहसीलदारावर हल्ला करणारे जेरबंद

बुधवारी दोन्ही आरोपींना ताब्यात घेऊन न्यायालयात हजर केले असता दोघांनाही न्यायालयीन कोठडीत ठेवण्याचा आदेश.

वाशिम: अवैध रेती घेऊन जाणार्‍या ट्रकला अडविण्याचा प्रयत्न करणार्‍या नायब तहसीलदार व एका कर्मचार्‍याच्या अंगावर ट्रक घालून जीवघेणा हल्ला करणार्‍या दोघांना वाशिम शहर पोलिसांनी बुधवारी जेरबंद केले. दोन्ही आरोपींना न्यायालयात हजर केले असता, न्यायालयीन कोठडीत ठेवण्याचे आदेश विद्यमान न्यायालयाने दिले. जिल्हय़ात अवैध रेतीची वाहतूक मोठय़ा प्रमाणात सुरू आहे. चार फेब्रुवारी रोजी दुपारी एमएच २९ - ७११३ क्रमांकाचा अवैध रेती घेऊन जाणारा ट्रक वाशिमच्या पथकाने जप्त करून तहसील कार्यालय परिसरात उभा केला होता. ट्रकमालक सचिन श्रीमेवार व ट्रक चालक सोनू धोत्रे दोघेही रा. वाशिम यांच्याविरुद्ध अवैध गौण खनिज वाहतुकीचा दंड आदेश पारित करण्याबाबतची कारवाई सुरू असताना, ऑइल टँक लिंक असल्याच्या कारणावरून सदरचा ट्रक हा तहसील कार्यालय आवाराच्या बाहेर लावण्यास सांगण्यात आले. यासाठी ट्रकची चाबी दिली असता, ट्रकचालकाने ट्रक पळवून घेऊन जाण्याचा प्रयत्न केला. सदर बाब नायब तहसीलदार राहुल वानखेडे यांच्या लक्षात येताच, त्यांनी कनिष्ठ लिपिक प्रमोद वानखेडे यांना सोबत घेऊन त्या ट्रकचा पाठलाग करण्याला सुरुवात केली. काटा रस्त्यावर असलेल्या पॉवर स्टेशनजवळ वानखेडे यांनी ट्रक थांबविण्याचा प्रयत्न केला; मात्र ट्रकचालक सोनू धोत्रे व मालक सचिन श्रीमेवार यांनी वानखेडे यांच्या अंगावर ट्रक नेऊन त्यांना जीवे मारण्याचा प्रयत्न केला. यामध्ये वानखेडे जखमी झाले होते. दरम्यान, वानखेडे यांच्या फिर्यादीवरून आरोपीविरुद्ध भादंवि कलम ३७९, ३५३, ३३२, २७९, ३४ व सहकलम ११९, १७७, १३२, १७९, १८४ नुसार वाशिम शहर पोलिसांनी गुन्हे दाखल केले. या प्रकरणाचा तपास ठाणेदार देशमुख यांच्या मार्गदर्शनाखाली जमादार मनोहर अष्टोनकर व सहकार्‍यांनी केला. आरोपींना ताब्यात घेण्यासाठी विशेष पथक रवाना झाले होते. बुधवारी दोन्ही आरोपींना ताब्यात घेऊन न्यायालयात हजर केले असता दोघांनाही न्यायालयीन कोठडीत ठेवण्याचा आदेश दिला.