यावेळी निवासी उपजिल्हाधिकारी शैलेश हिंगे, जिल्हा आरोग्य अधिकारी डॉ. अविनाश आहेर, जिल्हा शल्यचिकित्सक डॉ. मधुकर राठोड यांची उपस्थिती होती. तहसीलदार, गट विकास अधिकारी, तालुका आरोग्य अधिकारी, नगर परिषद व नगरपंचायतीचे मुख्याधिकारी या बैठकीमध्ये दूरदृश्य प्रणालीद्वारे सहभागी झाले होते.
जिल्हाधिकारी शण्मुगराजन एस. म्हणाले, कोरोना प्रतिबंधक लसीकरण मोहिमेला गती देण्यासाठी मोठ्या प्रमाणात जनजागृती करणे आवश्यक आहे. याकरिता तलाठी, ग्रामसेवक, आशा कर्मचारी, अंगणवाडी सेविका यांनी घरोघरी जाऊन कोरोना लसीकरणाबाबत माहिती द्यावी. तसेच ग्रामपंचायतीच्या माध्यमातून दवंडी देणे, ध्वनिक्षेपकावरून माहिती देऊन गावामध्ये जनजागृती करून लसीकरणाचे महत्त्व पटवून द्यावे. ज्या भागात कमी लसीकरण झाले आहे, त्याठिकाणी अधिक लक्ष केंद्रित करून लसीकरण वाढविणे आवश्यक आहे. याअनुषंगाने लवकरच तालुकानिहाय आढावा बैठक घेण्यात येईल, असे जिल्हाधिकाऱ्यांनी सांगितले. जिल्हा आरोग्य अधिकारी डॉ. आहेर यांनी कोरोना प्रतिबंधक लसीकरण मोहिमेविषयी तालुकानिहाय माहिती दिली. तसेच सर्व तालुका आरोग्य अधिकारी यांनी कोरोना लसीकरणाच्या अनुषंगाने सूक्ष्म नियोजन करण्याच्या सूचना केल्या.
००००००००००००
लसीकरण सत्रांचे आयोजन
जिल्ह्यात सध्या लसींची पुरेशा प्रमाणात उपलब्धता असून, नागरिकांच्या सोयीसाठी प्राथमिक आरोग्य केंद्र व उपकेंद्रांच्या अंतर्गत लसीकरण सत्रांचे आयोजन करावे. लसीचा पहिला डोस घेण्यासाठी येणाऱ्या नागरिकांना पहिला डोस दिल्यानंतर त्यांना दुसरा डोस कधी देय आहे, याविषयी माहिती द्यावी. दुसरा डोस घेण्यासाठी पात्र व्यक्तींना दूरध्वनीद्वारे संपर्क साधून माहिती द्यावी. लसीकरणासाठी नागरिकांचा प्रतिसाद वाढविण्यासाठी विशेष प्रयत्न करावेत. शहरी व ग्रामीण भागातील ‘सुपर स्प्रेडर’ ठरू शकणाऱ्या व्यक्तींचे लसीकरण करण्यावर विशेष भर द्यावा, अशा सूचना जिल्हाधिकारी शण्मुगराजन एस. यांनी दिल्या.