वाशिम : विद्युत देयक चुकविण्यासाठी वीज मीटरमध्ये फेरफार करण्याचा प्रयत्न संबंधित ग्राहकाला चांगलाच महागात पडणार आहे. वीज मीटरमध्ये फेरफार केल्यास दंडात्मक कारवाईबरोबरच वेळप्रसंगी फौजदारी कारवाईलादेखील सामोरे जावे लागणार आहे.
वीज ग्राहकांनी वापरलेल्या प्रत्येक वीज युनिटचे बिल भरणे अनिवार्य असताना वीज बिल चुकविण्यासाठी काही जण विद्युत मीटरमध्ये फेरफार करून महावितरणची फसवणूक करतात. परंतु ही वीज चोरी उघड झाल्यास संबंधित ग्राहकाला मोठी किंमत चुकवावी लागणार आहे. महावितरणकडून मुंबईवगळता राज्यभरात घरगुती, वाणिज्यिक, औद्योगिक व कृषी ग्राहकांना वीजपुरवठा केला जातो. वीज वापराच्या मोजमापासाठी ग्राहकांच्या घरात मीटर बसविले जातात. मीटर रिडिंगनुसार वीज बिलाची आकारणी केली जाते. वीज बिल चुकविण्यासाठी काही ग्राहक चक्क मीटरमध्येच फेरफार करतात. वीजचोरी पकडली गेल्यास त्याचे गंभीर परिणाम भोगावे लागू शकतात. भारतीय विद्युत कायद्याच्या कलम १३५, १३८ व १२६ अंतर्गत गुन्हा दाखल करून वीज चोरी करणाऱ्याविरूद्ध फौजदारी खटला दाखल केला जाऊ शकतो.
०००००००००००
मीटरजप्ती अन् वापरापेक्षा दुप्पट दंड
वीज चोरी करणे हा कायद्याने गुन्हा आहे. एखाद्या ग्राहकाकडे वीज चोरी पकडली गेल्यास वीज वापरापेक्षा दुप्पट रक्कम, दंड व तडजोडीची रक्कम भरण्याचा पर्याय देण्यात येतो.
तडजोडीचा प्रस्ताव स्वीकारल्यास अशा ग्राहकांचा वीजपुरवठा पुन्हा बहाल केला जाऊ शकतो. तथापि, तडजोडीचा प्रस्ताव स्वीकारला नाही तर मीटर जप्त करून वीजपुरवठा कायमस्वरुपी खंडित करण्याची कारवाई केली जाते. वेळप्रसंगी फौजदारी कारवाईही होऊ शकते.
००००
कधीही होऊ शकते मीटरची तपासणी
विद्युत चोरीला आळा घालण्यासाठी महावितरणची पथके सदैव दक्ष असतात. भरारी पथकही कारवाई करते. भरारी पथकाने सन २०१८-१९ मध्ये १७०, २०१९-२० मध्ये १४०, २०२०-२१ मध्ये ७७ आणि एप्रिल ते ऑगस्ट २०२१ या कालावधीत ४३ प्रकरणांत दंडात्मक कारवाई केली. याशिवाय महावितरणच्या अन्य स्थानिक पथकांनीदेखील वीजचोरीप्रकरणी कारवाया केल्या आहेत.
एखाद्या ठिकाणी वीज चोरी होत असल्याची शंका आल्यास किंवा कुणी गुप्त माहिती दिल्यास ही पथके संबंधित व्यक्ती, उद्योग अथवा व्यावसायिक प्रतिष्ठानांवर छापा टाकून मीटरची तपासणी करू शकतात.
००००००००००००००००००००
वीज मीटरमध्ये फेरफार करणाऱ्यांविरूद्ध कारवाई
२०१८-१९ १७०
२०१९-२० १४०
२०२०-२१ ७७
००००००००००००००
कोट
वीजचोरी हा कायद्याने गुन्हा असून, त्यासाठी शिक्षेची तरतूदही आहे. मीटरमध्ये फेरफार होत असल्याची गुप्त माहिती मिळाल्यावरून तपासणी केली जाते. मीटरमध्ये छेडछाड केल्याचे आढळल्यास अशा ग्राहकांविरूद्ध दंडात्मक तसेच वेळप्रसंगी फौजदारी कारवाई केली जाऊ शकते. कारवाई टाळण्यासाठी वीज मीटरमध्ये कुणीही छेडछाड करू नये.
- सतीश मोरे,
अतिरिक्त कार्यकारी अभियंता
भरारी पथक, वाशिम.
००००००००००