पळसखेड प्रकल्पाच्या बुडीत क्षेत्रातील लाभार्थींना मोबदल्याची प्रतीक्षा !

पळसखेड परिसरात सिंचनाची सुविधा उपलब्ध व्हावी याकरिता पाच, सहा वर्षांपूर्वी प्रकल्पाची निर्मिती करण्यात आली. या प्रकल्पाच्या बुडीत क्षेत्रात काही झाडे, विहिरी व घरे गेली असून, आतापर्यंत संबंधित लाभार्थींना मोबदला मिळणे अपेक्षित होते. परंतु, यापासून काही लाभार्थी अद्याप वंचित आहेत. राज्याचे जलसंपदा मंत्री जयंत पाटील हे ५ व ६ फेब्रुवारी रोजी वाशिम जिल्हा दौऱ्यावर असताना, मोबदला मिळाला नसल्याची आपबिती काही लाभार्थींनी जलसंपदा मंत्र्यांसमोर कथन केली. याप्रकरणी जलसंपदा व पाटबंधारे विभागाने तातडीने पावले उचलून संबंधित लाभार्थींना लवकरात लवकर मोबदला मिळण्याच्या दृष्टिकोनातून कार्यवाही करावी, अशा सूचना ना. पाटील यांनी दिल्या. त्यानुसार पुढील कार्यवाही केली जात असल्याचे सांगण्यात येते. पळसखेड प्रकल्पाच्या बुडीत क्षेत्रातील काही झाडे, विहिरी व घरांचा मोबदला लवकरच मिळेल, या आशेवर लाभार्थी आहेत.