आरोपीवर पोलिसांची मेहरनजर

कोटयवधी रूपयांचे खत जप्त प्रकरण: आर्थिक देवाण-घेवाणची चर्चा

वाशिम : खताची साठेबाजी करून व बोगस बियाणे विक्री करून शेतकर्‍यांना फसवू पाहणार्‍या विजयकुमार दागडीया यांच्यावर पोलीसांनी तीन दिवसापूर्वी गुन्हा दाखल केला. मात्र या आरोपीला पोलीसांनी अद्यापही अटक न केल्याने सदर प्रकरणात आर्थीक देवाण घेवाण केल्याची चर्चा शहरभरात रंगत आहे. वाशिम येथील विजयकुमार दागडीया यांच्या काटा रोडवरील गोडावून मध्ये मोठया प्रमाणात रासायनिक खताचा अनाधिकृत साठा कृषी विभागाच्या विशेष पथकाला आढळून आला. या पथकाने एक कोटी ६८ लाख ४५ हजार रूपये किमंतीचा खत साठा जप्त केला. प्राप्त माहितीनुसार विजयकुमार भगवानदास दागडीया हे कोरोमंडल इंटरनॅशनल लि. या खताच्या कंपनीचे हॅन्डलींग अँन्ड ट्रान्सपोर्ट एजन्ट आहे. त्यांच्या पंचाळा व काटा रोडवरील गोदामवर कृषी अधिकार्‍यांनी टाकलेल्या छाप्यामध्ये ८५ लाख रूपयांचा ५२४ मॅट्रीक टन रासयनिक खत आढळून आले. तपासणी केल्यानंतर खत नियंत्रण आदेश १९८५ च्या तरतुदीचे उल्लंघन केल्यामुळे ८५ लाख रूपयांच्या ५२४ मॅट्रीक टन खतासाठी विक्री बंदचे आदेश देण्यात आले ही कारवाई गुणनियंत्रण कायदयाअंतर्गत करण्यात आली. त्यानंतर शासन परवाना नसलेल्या काटा रोडवरील गोदामची तपासणी करण्यात आली त्या ठिकाणी एक कोटी ६८ लाख ४ ५ हजार रूपये किमंतीचे ८८४ मॅट्रीक टन खत आढळून आले. एवढा मोठा खत साठा जप्त करण्यात आल्यानंतर खताची साठेबाजी करणार्‍याचे धाबे दणाणून गेले. जीवनावश्यक वस्तू कायदयानुसार व इतर अनेक कायदयान्वये दागडीया यांच्याविरूध्द गुन्हे दाखल झाले आहेत. शेतकर्‍यांच्या जीवाशी खेळ करू पाहणार्‍या दागडीया यांना अटक करण्यासाठी पोलीस दिरंगाई करीत असल्याने यामध्ये आर्थीक देवाण घेवाण झाल्याची चर्चा संतप्त शेतकर्‍यांमध्ये होत आहे. इसीए कायदाअंतर्गत गुन्हा सिध्द झाल्यास दागडीया यांना जामिन मिळणे कठीण तर होईलच शिवाय सात वर्षाच्या शिक्षेची कायदयात तरतूद आहे. इतक्या गंभीर स्वरूपाचा गुन्हा असतांनाही सदर आरोपी गावामध्ये राजरोसपणे फिरत असून पोलीसांच्या नजरेत आरोपी पसार असल्याचे समोर येत आहे. या आरोपीला वाचविण्यासाठी हैद्राबादस्थित कोरोमंडलच्या अधिकार्‍यांसह व्यापार्‍यांनी पोलीसांसोबत सेटींग करण्यासाठी फिल्डींग लावली आहे. शहरातील काही प्रतिष्ठीत व्यापार्‍यानी एका वरिष्ठ पोलीस अधिकार्‍याची भेट घेवून उच्च न्यायालयात अटक पूर्व जामिनासाठी पोलीसांचा ह्यसेह्ण दागडीया व कोरोमंडल अधिकार्‍यांसाठी पूरक असावा जेणेकरून त्यांचा तात्काळ जामिन व्हावा अशी चर्चा झाल्याची माहिती आहे. या चर्चेनंतर सायंकाळी एका गुप्त ठिकाणी फरार असलेले दागडीया, कोरोमंडल अधिकारी आणि व्यापारी यांच्यात बैठक होवून मोठया रकमेची सेटींग झाल्याची माहिती सुत्राकडून प्राप्त झाली आहे. शेतकर्‍यांची फसवणूक करणार्‍या दागडीया अँन्ड कंपनीला पोलीसांनी पाठबळ दिल्याने शेतकर्‍यांचा वाली कोणीच उरला नाही.