लोकमत न्यूज नेटवर्क
मीरारोड : मीरा भाईंदर महापालिकेने शहरातील गरजू महिलांना स्वयंरोजगारसाठी दळण दळण्याचे यंत्र तसेच ओला व सुका कचरा वेगळा ठेवण्यासाठी कचऱ्याचे डबे वाटले .
आयुक्त तथा प्रशासक दिलीप ढोले यांच्या उपस्थितीत महिला व बालकल्याण विभागामार्फत महानगरपालिकेच्या सर्व महिलांकरिता पर्यावरणाचे संवर्धन व जनजागृती करणेकामी सांस्कृतिक कार्यक्रम, हळदीकुंकू अंतर्गत ओला व सुका कचरा वेगवेगळा ठेवण्यासाठी कचऱ्याचे डबे भेट म्हणून देण्यात आले . तसेच शहरातील गरीब व गरजू महिलांना स्वयंरोजगारकरीता मल्टिग्रेन आटा मशीन वाटप करण्याचा कार्यक्रम संपन्न झाला.
महिलांच्या सक्षमिकरणासाठी महानगरपालिका सदैव कटिबद्ध असून महिला व बालकल्याण विभागाने आतापर्यंत महिलांसाठी विविध उपाययोजना राबविल्या आहेत. त्यात स्व. इंदिरा गांधी रुग्णालयात महिलांसाठी मॅमोग्राफी मशीन उपलब्ध करून दिली आहे. महिलांना सक्षम व आत्मनिर्भर करण्याच्या हेतूने महिला भवनाची निर्मिती केली आहे . महिलांना कापडी पिशवी बनविणे , मेहंदी व नेल आर्ट , फॅशन डिझाईन, वाहन चालवणे, बेसिक कॉम्प्युटर टॅली, ज्युडो कराटे, एमएस - सीआयटी, वेब डिझाईन व योग आदी प्रशिक्षण देऊन महिलांना अधिक सक्षम करण्याचा ध्यास महापालिकेने घेतला असल्याचे आयुक्त ढोले यावेळी म्हणाले.
अतिरिक्त आयुक्त संभाजी पानपट्टे व अनिकेत मानोरकर, उपायुक्त मारुती गायकवाड, कल्पिता पिंपळे, संजय शिंदे व रवी पवार, महानगरपालिका अधिकारी, कर्मचारी व महिला वर्ग उपस्थित होते.