वडनेर (वर्धा) : हिंगणघाट तालुक्यातील कुटकी शेतशिवारात अंगावर वीज कोसळून एका महिलेचा मृत्यू झाला. ही घटना रविवारी दुपारी ३:०० वाजताच्या सुमारास घडली. अश्विनी नामदेव पांगुळ (३५), असे मृत महिलेचे नाव.
वडनेर नजीकच्या कुटकी शिवारात रविवारी दुपारच्या सुमारास विजांच्या गडगडाटासह पावसाने हजेरी लावली. यावेळी अश्विनी पांगूळ, त्यांचे पती नामदेव, सुमंत पांगूळ व त्यांची पत्नी निकीता, ही मंडळी शेतात काम करीत होती. सुमंत फवारणी करीत होते, तर नामदेव डवरण करीत होते. अश्विनी, निकीता आदी शेतातील गवताचे पुंजाणे गोळा करीत होते. अचानक दुपारी ३:०० वाजताच्या सुमारास अश्विनी पांगूळ यांच्या अंगावर वीज कोसळली. विजेच्या झटक्याने त्यांचा जागीच मृत्यू झाला.
याप्रकरणी सुमंत पांगूळ यांनी वडनेर पोलिसांना माहिती दिली. पाेलिसांनी लगेच घटनास्थळ गाठून पंचनामा केला. मृतदेह उत्तरीय तपासणीसाठी रवाना करण्यात आला. सहायक पोलिस निरीक्षक लक्ष्मण लोकरे यांच्या मार्गदर्शनात रीना कावडे, सचिन रोकडे पुढील तपास करीत आहे.