वर्धा : पर्यावरण विभागाने घालून दिलेल्या नियमांचे उल्लंघन करीत अनेक ठिकाणी रेती घाटधारक रेतीचा अति उपसा करीत आहेत़ यासाठी सर्रास जेसीबीसह अन्य यंत्रांचा वापर करीत असल्याचे चित्र आहे़ हा प्रकार अनेक ठिकाणी केला जात असताना प्रशासन कानाडोळा करीत असल्याचे दिसून येत आहे़ या प्रकारामुळे नदीचे पात्र मात्र धोकादायक ठरत आहे़ रेतीच्या उपस्याकरिता घाट धारकांनी थेट नदीच्या पात्रातच अनेक ठिकाणी रस्ता केल्याचे दिसून येते़ या रस्त्यावरून मोठ-मोठी यंत्रे, जेसीबी, पोकलॅण्ड यासह अन्य वाहने थेट रेतीपर्यंत नेली जातात़ या प्रकारामुळे नदीचे पात्र धोक्यात आले आहे़ नदीपात्रात मोठे व खोल खड्डे पडल्याने ते धोकादायक ठरत आहे़ यात पर्यावरण नियमांचेही सर्रास उल्लंघन केले जात आहे़ पर्यावरणाच्या सबबीखाली शासनाने तब्बल दोन महिने रेती उपस्यावर बंदी घातली होती. यामुळे जिल्ह्यात विकासकामे ठप्प पडली़ यानंतर मागील महिन्यात वाळू उपसा करण्याची परवानगी देण्यात आली; पण यासाठी शासनाने काही अटी घालून दिल्यात़ यात ठरवून दिलेल्या जागेतूनच वाळूचा उपसा करावा, जेसीबीचा वापर करू नये, नदीचे पात्र अधिक खोल होणार नाही, याची काळजी कंत्राटदारांनी घ्यावी, अशा अनेक अटींचा समावेश होता; पण हे नियम धाब्यावर बसविण्यात आले़ काही तालुक्यांत एक महिना मिळालेल्या संधीचे सोने करीत घाट धारकांनी लागलेला पैसाही वसूल केला़ चिरीमिरीच्या नादात अधिकारी दुर्लक्ष करीत असल्याने घाटधारकांचे फावले आहे़(कार्यालय प्रतिनिधी)
रेती उपसण्याकरीता जेसीबीसह यंत्रांचा वापर
By admin | Updated: May 23, 2014 00:09 IST