महेश सायखेडे, वर्धा : अल्पवयीन मुलीचे लैंगिक शोषण करीत तिच्यासोबत वारंवार अतिप्रसंग करण्याऱ्या नराधमास दहा वर्षांच्या सश्रम कारावासासह दंडाची शिक्षा ठोठावण्यात आली. संबंधित निकाल वर्धा येथील जिल्हा न्यायाधीश-२ तथा अतिरिक्त सत्र न्यायाधीश आर. व्ही. आदोने यांनी बुधवारी दिला असून मिलिंद ज्ञानेश्वर गिरीसपुंजे रा. देवळी असे शिक्षेस पात्र ठरलेल्याचे नाव आहे.
आरोपी मिलिंद गिरीसपुंजे यास भादंविच्या कलम ३७६ (२) (आय) (एन) अन्वये दहा वर्षांचा सश्रम कारावास व पाच हजार रूपये दंड तसेच दंड न भरल्यास अतिरिक्त सहा महिन्यांच्या कारावासाची शिक्षा ठोठावण्यात आली आहे. तर फौ.प्र.स.च्या कलम ३५७ अन्वये पीडितेला नुकसान भरपाई म्हणून दंडाच्या रकमेतून दोन हजार रुपये देण्याचे आदेश दिले आहे. संबंधित प्रकरणी तक्रारीवरून देवळी पोलीस ठाण्यात गुन्हा दाखल झाल्यावर देवळीचे तत्कालीन पोलीस उपनिरीक्षक गजानन दराडे यांनी प्रकरणाचा तपास पूर्ण करून प्रकरण न्यायप्रविष्ट केले होते. ॲड. प्रसाद प. सोईतकर यांनी न्यायालयात शासकीय बाजू मांडली. तर पैरवी अधिकारी म्हणून ना.पो.शि. समीर कडवे यांनी काम पाहिले. शासनातर्फे एकूण बारा साक्षदारांची साक्ष न्यायालयात तपासण्यात आली.'पहिले हम साथ साथ है' नंतर 'हम आपके है कोण'
पीडिता ही वसतीगृहात राहून नवव्या वर्गाचे धडे घेत होती. पीडितेच्या शाळेसमोरील फोटो स्टुडिओत मिलिंद हा नेहमी बसायचा. त्याने पीडिते सोबत ओळख करून घेत तिच्याशी जवळीक निर्माण केली. जानेवारी २०१५ मध्ये आरोपीने पीडितेला मी तुझ्यावर प्रेम करतो, तुझ्या सोबत लग्न करावयाचे आहे असे सांगत तिला मोबाईल घेऊन दिला. त्यानंतर आरोपीने पीडितेला देवळी येथे किरायाने रुम करून दिली. तेथे आरोपीने येत पीडितेच्या इच्छेविरुद्ध शारीरिक संबंध केले. आरोपीला पीडितेच्या रूमवर येताना घरमालकाने बघितल्यामुळे तिला सदर रूम सोडण्यास सांगण्यात आले.
त्यानंतर आरोपी हा पीडितेला त्याच्या घरी घेऊन गेला. शिवाय तिला एक रुम दिली. दरम्यान पीडिता ही मध्यप्रदेशातील भोपाळ येथे गेली असता आरोपीने भोपाळ गाठले. मी तुझ्या सोबत लग्न करतो, शिक्षणाचा पूर्ण खर्च करतो असे सांगून आरोपीने पीडितेला सोबत आणले. वर्धा येथे किरायाने रूम करून दिली. त्यानंतर आरोपीने पीडिते सोबत अनेक वेळा शारीरिक संबंध केले. नंतर आरोपी पीडितेला काहीच न सांगता तेथून निघून गेला. पीडितेने आरोपी सोबत त्याचे मोबाईलवर वारंवार संपर्क केला असता आरोपीने माझा तुझ्या सोबत काहीही संबंध नाही, मी तुझ्या सोबत लग्न करणार नाही, मला भेटु नको असे सांगितले. त्यानंतर पीडितेने शेजारील महिला सोबत घेत देवळी पोलीस स्टेशन गाठून तक्रार नाेंदविली.