किसान अधिकार अभियानची पत्रकार परिषदेत माहिती वर्धा : जिल्ह्यातील सेलू तालुक्यातील बहुचर्चित सिंदी (रेल्वे) कृषी उत्पन्न बाजार समिती उपबाजारपेठ, सेलू अंतर्गत ४०० कापूस उत्पादकांचे पैसे श्रीकृष्ण जिनींग व प्रेसींगचा मालक सुनील प्रभाकर टालाटुले याने बुडविले. या विरोधात दिल्लीपासून नागपूर आणि वर्धेत आंदोलने झाली. यामुळे शासनाने त्याच्या स्थावर व जंगम संपत्तीचा जाहीर लिलाव करण्याचा निर्णय घेतला. मध्यंतरी शासनाच्या या आदेशाविरोधात स्थगनादेश आणण्याचा काहींचा प्रयत्न होता. मात्र आता हा लिलाव जमीन महसुलाच्या वसुली पद्धतीनुसार ११ व १२ एप्रिल रोजी होणार असल्याची माहिती सेलूचे तहसीलदार डॉ. रवींद्र होळी यांनी दिल्याचे किसान अधिकार अभियानचे मुख्यप्रेरक अविनाश काकडे यांनी शनिवारी पत्रकार परिषदेत सांगितले. या लिलाव प्रक्रियेतून शेतकऱ्यांचे ८ कोटी रुपये वसूल झाले नाही तर शासनाने या रक्कमेची व्यवस्था करावी. अन्यथा शेतकऱ्यांना आपल्या न्याय हक्कांसाठी रस्त्यावर उतरावे लागेल. याची सर्वस्वी जबाबदारी शासनावर राहील असेही ते यावेळी म्हणाले. यासंदर्भात सोमवारी सकाळी ११ वाजता कृषी उत्पन्न बाजार समिती, सेलू येथे सर्व संबंधीत शेतकऱ्यांची सभा आयोजित आहे. शेतकऱ्यांनी या सभेला उपस्थित राहावे असे आवाहन नागपूर येथील राष्ट्रीय प्रभारी किसान व शेतमजूर कॉँग्रेसचे काकडे, किसान अधिकार अभियानचे अविनाश काकडे यांनी केले आहे. यावेळी सुदाम पवार, प्रा. नूतन माळवी, रामनारायन पाठक, मोहन सोनूरकर, मनोज शिंदे, प्रमोद तडस, मंगेश ढोणे, अ‍ॅड. अनिता ठाकरे, सविता घोडे, अरूण येळणे उपस्थित होते.(प्रतिनिधी)
सुनील टालाटुलेच्या संपत्तीचा लिलाव होणारच
By admin | Updated: April 10, 2016 02:23 IST