१२ गावांचा समावेश : चार वर्षांपर्यंत मिळणार सिलिंडर ंवर्धा : जंगल क्षेत्रातील वनसंपदेचे संरक्षण करण्यासाठी ग्रामस्थांचा सहभाग वाढविण्यासोबतच गावांमध्ये आवश्यक सुविधा निर्माण करण्यासाठी बोर अभयारण्य परिसरातील १२ गावांमधील आदिवासी समाजबांधवांना एक हजार चार एलपीजी गॅस जोडीणी उपलब्ध करून देण्यात आली आहे. बोर अभयारण्य परिसरात असलेल्या पेंढरी, वानरविहिरा, नवरगाव, सालई, गरमसूर यासह इतर १२ गावांमध्ये ग्रामपरिसर विकास समितीची स्थापना करण्यात आली. या समितीमार्फत जंगल क्षेत्रातील वृक्षतोड थांबवून तसेच जंगलावरील अवलंबीत्व कमी करण्याच्या दृष्टीने या आवश्यक सुविधा गावातच निर्माण करण्यात येत आहे. जंगल क्षेत्रातील गावांमध्ये दररोज जळणासाठी वापरण्यात येणार्‍या लाकडाऐवजी प्रत्येक कुटुंबांना एलपीजी गॅस कनेक्शन देवून सवलतीच्यादरात नियमितपणे गॅस सिलिंडर उपलब्ध करून देण्याचा उपक्रम मुख्य वनसंरक्षक व क्षेत्रसंचालक एम.एस.रेड्डी यांनी राबविला आहे. यामुळे या क्षेत्रातील वृक्षतोडीवर नियंत्रण आले असून, आदिवासी कुटुंबांना घरपोच सिलिंडरसुद्धा उपलब्ध होत आहे. नवरगाव येथील गॅस कनेक्शन वितरण कार्यक्रमात मुख्य वनसरंक्षक एम.एस.रेड्डी, उपवनसंरक्षक एस.बी.भलावी, उत्तम सावंत, वनपरिक्षेत्र अधिकारी आर.पी. गायनेर, वनपाल व्ही.व्ही. शिरपूरकर यांच्या हस्ते २८ लाभार्थ्यांना गॅस जोडणी वितरण करण्यात आले आहे. अभयारण्यालगतच्या गावांना गॅस सिलिंडर या उपक्रमांतर्गत गावपरिसर विकास समिती मार्फत पेंढरी गावात ४८ लाभार्थ्यांना गॅस कनेक्शन देण्यात आले आहे. तसेच वानरविहिरा येथे ९३, सोंडी या गावात १४१, सालईकला १0१, आमगाव ९, मोळेगाव टेका ६५, नवरगाव २८, सालई पेवठ १५४, गरमसूर ५१, गोठणगाव ८८, धानोली ११२, नवेगाव ११७ अशा १२ गावांमध्ये एक हजार चार गॅस जोडणी देण्यात आली आहे. ज्या गावांमध्ये आरोग्य सुविधा, शैक्षणिक सुविधा आदी उपक्रमही बोर अभयारण्य प्रशासनातर्फे राबविण्यात येत आहेत. या उपक्रमामुळे गावकर्‍यांमध्ये वरसंरक्षणासाठी सहभाग वाढत असून जंगलावरील अवलंबित्व कमी होत आहे. वनसंरक्षणासाठी लोकसहभाग वाढविण्याचा उपक्रम सर्वांसाठी मार्गदर्शक आहे.(प्रतिनिधी)
एक हजार आदिवासींना गॅस जोडणी
By admin | Updated: May 27, 2014 23:53 IST