अमित शाहविरुद्ध गुन्हा दाखल करा

काळा पैशाला ब्रेक लागावा या हेतूने नोटबंदीचा निर्णय घेण्यात आल्याचे भाजपा पुढारी सांगत असले तरी खऱ्या अर्थाने नोटबंदीचा फायदा भाजपाचे राष्ट्रीय अध्यक्ष अमित शाह यांनाच झाला आहे. भाजपाचे राष्ट्रीय अध्यक्ष शाह यांनी नोटबंदीच्या कालावधीत मोठ्या प्रमाणात काळा पैसे पांढरा केला.

ठळक मुद्देकाँग्रेस मागणी : प्रदेशाध्यक्षांच्या नेतृत्वात पोलीस कचेरीवर मोर्चा

लोकमत न्यूज नेटवर्कवर्धा : काळा पैशाला ब्रेक लागावा या हेतूने नोटबंदीचा निर्णय घेण्यात आल्याचे भाजपा पुढारी सांगत असले तरी खऱ्या अर्थाने नोटबंदीचा फायदा भाजपाचे राष्ट्रीय अध्यक्ष अमित शाह यांनाच झाला आहे. भाजपाचे राष्ट्रीय अध्यक्ष शाह यांनी नोटबंदीच्या कालावधीत मोठ्या प्रमाणात काळा पैसे पांढरा केला. त्यामुळे त्यांच्याविरुद्ध गुन्हा दाखल करण्यात यावा, अशी मागणी काँग्रेसच्यावतीने गुरूवारी शहर पोलीस ठाण्यावर मोर्चा काढून करण्यात आली. मोर्चाचे नेतृत्त्व महिला काँग्रेसच्या प्रदेशाध्यक्षा चारुलता टोकस यांनी केले.नोटाबंदीच्या कालावधीत सर्वाधिक जुन्या नोटा भाजपाचे राष्ट्रीय अध्यक्ष अमित शाह यांच्या बँकेत जमा करण्यात आल्या. नोटबंदीच्या निर्णयाचा सर्वाधिक फटका व त्रास सर्वसामान्य नागरिकांनाच सहन करावा लागला; पण याच कालावधीत भाजपाचे राष्ट्रीय अध्यक्ष म्हणून जबाबदारी सांभाळत असलेले अमित शाह यांनी आपल्या बँकेत जुन्या नोटा मोठ्या प्रमाणात जमा करून घेतल्या. हा प्रकार कष्टकरी व सर्वसामान्यांच्या जखमांवर मिठ चोळणाराच आहे. त्यामुळे भाजपाचे राष्ट्रीय अध्यक्ष अमित शाह याच्याविरुद्ध गुन्हा दाखल करण्यात यावा, अशी मागणी शहर पोलीस ठाण्यात देण्यात आलेल्या निवेदनातून करण्यात आली आहे. मगन संग्रहालय भागातील सदभावना भवन येथून निघालेला मोर्चा दुपारी १.१५ वाजताच्या सुमारास शहर पोलीस स्टेशन येथे पोहोचला. यावेळी शहर पोलीस स्टेशनचे ठाणेदार चंद्रकांत मदने यांना निवेदन सादर करण्यात आले. मोर्चात महिला काँग्रेसच्या जिल्हाध्यक्षा हेमलता मेघे, महेश तेलरांधे, काँग्रेसचे प्रभारी जिल्हाध्यक्ष सुनील कोल्हे, माजी नगरसेवक डब्बु शर्मा, एनएसयुआयचे जिल्हाध्यक्ष प्रतिक भोगे, गोविंद दैय्या, शुभम शेळके, विपीन राऊत, निनाद जगताप, विराज शिंदे, धनंजय दंधारे, अनिकेत कोटमकार, मयुर उईके, अनिकेत एकलारे, विपुल शेडमाके, हातमोडे आदी सहभागी झाले होते.