उल्हासनगर : महापालिका महासभेत उपायुक्तांच्या दिशेने पिण्याच्यापाण्याची बाटली भिरकावणे आणि महापौर हाय-हाय... घोषणांनी सभागृह दणाणून सोडणे, अशा शिवसेना नगरसेवकांच्या गोंधळाने दुसरी महासभा सोमवारी गाजली. या गदारोळात महापौर मीना आयलानी व सभागृह नेते जमनुदास पुरस्वानी यांनी पटलावरील कामकाज उरकले. उल्हासनगर महापालिकेची महासभा विशेष समिती सदस्यांच्या निवडीवरून वादळी ठरण्याचे संकेत प्राप्त झाले होते. काँग्रेसच्या नगरसेविका अंजली साळवे, भारिपच्या नगरसेविका कविता बागुल यांनी काळ्या फिती लावून सभागृहात प्रवेश केला. सुभाषटेकडी प्रभाग क्र. १८ मधील पाणीटंचाईची समस्या सुटत नाही, तोपर्यंत सभागृहात उभे राहणार असल्याचे या नगरसेविकांनी महापौरांना सांगितले. आठवड्यात फक्त दोन दिवस आणि तेही अर्धा तास पाणी येते, नागरिक हातपंपाचे दूषित पाणी पित असल्याने हजारो नागरिकांच्या आरोग्याचा प्रश्न निर्माण झाल्याकडे त्यांनी लक्ष वेधले. नगरसेवक प्रमोद टाले, सुमित सोनकांबळे, ज्योत्स्ना जाधव, ज्योती माने यांनीही सुभाष टेकडी परिसरातील पाणीटंचाईचा पाढा वाचला.सभागृह नेते जमनुदास पुरस्वानी, राष्ट्रवादीचे गटनेते भरत गंगोत्री, सुनीता बगाडे, मीना सोंडे, वसुधा बोडारे, राजश्री चौधरी, दीपा पंजाबी, किशोर वनवारी, राजेश वधारिया, रमेश चव्हाण, टोनी सिरवानी आदींनी चर्चेत भाग घेतला. तब्बल दोनतास पाणीटंचाईवर महासभा गाजली. महासभेच्या पटलावरील विषय प्रभारी सचिव व उपायुक्त जमीर लेंगरेकर यांनी वाचण्यास सुरुवात करताच शिवसेना नगरसेवकांनी त्याला विरोध केला. गेल्या महासभेतील आयुक्तांचे राहिलेले निवेदन पूर्ण करण्याची मागणी केली. मात्र, महापौरांच्या सूचनेनुसार लेंगरेकर यांनी पटलावरील विषय वाचताच नगरसेवक सुनील सुर्वे यांनी पाण्याची बाटली उपायुक्त लेंगरेकर यांच्या दिशेने फेकून मारली. याप्रकाराने महासभेतील वातावरण चिघळले. लेंगरेकर यांनी या घटनेचा तीव्र शब्दांत निषेध केला, तर शिवसेना नगरसेवकांनी महापौर हाय-हाय घोषणा सुरू केल्या. सत्ताधारी नगरसेवक राजेश वधारिया, किशोर वनवारी यांनी विषय मताला टाकण्याची मागणी केली. सभागृह नेते पुरस्वानी यांनी विरोधी नगरसेवकांची समजूत काढत आयुक्तांना गेल्या महासभेतील निवेदन करण्यास सांगितले. (प्रतिनिधी)
उपायुक्तांवर फेकली पाण्याची बाटली
By admin | Updated: April 25, 2017 00:09 IST