मीरारोड - भाईंदर पोलिसांनी अमली पदार्थ तस्कर व विक्रेत्यां वर कारवाई करून दोघांना अटक केली असून त्यांच्या कडून साडेचार लाखांचे हेरॉईन हे अमली पदार्थ व रिक्षा असा ५ लाख ६१ हजर रुपयांचा मुद्देमाल जप्त केला आहे.
भाईंदर पश्चिमेच्या भोला नगर भागात अमली पदार्थाच्या विक्रीसाठी येणार असल्याची माहिती भाईंदर पोलिसांना मिळाली होती . पोलीस उपायुक्त प्रकाश गायकवाड, सहायक पोलीस आयुक्त दीपाली खन्ना व वरिष्ठ निरीक्षक सूयकांत नाईकवाडी यांच्या मार्गदर्शनाखाली गुन्हे विभागाचे पोलीस निरीक्षक विवेक सोनावणे व पोलीस पथकाने गुरुवारी सापळा रचला.
भोला नगर जवळ, जे.पी. इन्फ्रा बांधकाम साईटच्या बाजूला मुकुंदम इमारतीच्या समोर रिक्षातून संशयित येताच पोलिसांनी छापा मारून त्यांना ताब्यात घेतले . रिक्षा चालक गौतम रमेशचंद्र गुप्ता ( वय ३० वर्ष ) आणि सचिन उर्फ बटला राधेश्याम गुप्ता ( वय २३ वर्ष ) ह्या दोघांना पोलिसांनी ताब्यात घेतले. दोघेही भोला नगर येथील राहणारे आहेत.
त्यांच्य्या कडून १८ ग्राम वजनाचा व ४ लाख ५० हजार किमतीचा हेरॉईन हा अमली पदार्थ व रोख रक्कम आणि रिक्षा असा ५ लाख ६१ हजारांचा मुद्देमाल पोलिसांनी जप्त केला आहे. पोलीस उपनिरीक्षक यशवंत साळुंखे हे अधिक तपास करत आहेत.