ठाणे : शिवजयंतीच्या मिरवणुकांना विरोध करून राज्य सरकार गुंडप्रवृत्तीला साथ देते ही शोकांतिका आहे, अशा शब्दांत भाजपचे ठाणे शहर जिल्हाध्यक्ष आमदार निरंजन डावखरे यांनी महाविकास आघाडी सरकारवर तोफ डागली. महाराष्ट्राचे आराध्य दैवत छत्रपती शिवाजी महाराज यांच्या जयंतीनिमित्त ठाणे पूर्वेकडील कोपरी येथे भाजपच्या ठाणे जिल्हा स्लम सेलचे अध्यक्ष कृष्णा भुजबळ यांच्यावतीने ऐतिहासिक गड-किल्ल्यांच्या छायाचित्रांचे प्रदर्शन भरविण्यात आले आहे. या उपक्रमाचे उद्‌घाटन डावखरे आणि आमदार संजय केळकर यांच्या हस्ते शुक्रवारी झाले.
शिवजयंतीचे औचित्य साधून ठाणे पूर्व येथील रेल्वे स्थानकानजीक भुजबळ यांनी, मुंबईच्या दुर्गवीर प्रतिष्ठानच्या माध्यमातून गड-किल्ल्यांची तसेच, दुर्ग संवर्धनाच्या जनजागृतीपर छायाचित्रांचे प्रदर्शन आयोजित केले आहे. या प्रदर्शनाला अनेक इतिहासप्रेमी नागरिक आणि तरुणाईने भेट दिली. यावेळी आ. केळकर म्हणाले की, हा इतिहास जपण्याचा प्रयत्न असून याद्वारे नागरिकांना गड-किल्ल्यांची माहिती मिळते. डावखरे यांनी हे प्रदर्शन भरविल्याबद्दल कृष्णा भुजबळ व सहकाऱ्यांचे कौतुक केले. ज्या मंत्र्यांवर कारवाई करायला हवी त्यांच्या समर्थनार्थ रॅली निघते. गुंडप्रवृत्तीला साथ देणाऱ्या सरकारचा कोणावरही अंकुश राहिलेला नाही, ही खरी शोकांतिका असल्याची टीका डावखरे यांनी केली.
.........
वाचली