ठाणे : भरधाव वेगाने केकचे बॉक्स घेऊन निघालेल्या टेम्पो घोडबंदर रोडवरील मेट्रो मेटल बॅरिकेडला जाऊन धडकल्याची घटना गुरुवारी सकाळी पावणे आठ वाजण्याच्या सुमारास कासारवडवली, डी मार्ट समोर घडली. यामध्ये चालक राजू साव(५०) हा किरकोळ जखमी झाला असून त्याला खासगी रुग्णालयात उपचारार्थ दाखल केले आहे.
चालक साव हे टेम्पोमध्ये केकचे बॉक्स घेऊन घोडबंदर रोडने जाताना, घोडबंदर रोडवर सुरू असलेल्या मेट्रो मेटल बॅरिकेड जाऊन जोरात धडकले. या दुघटनेत,चालक साव यांच्या पायाला किरकोळ दुखापत झाली आहे. यावेळी ते एकटेच टेम्पोत होते. तसेच चालकाची बाजूच मेटल बॅरिकेडला धडकल्याने त्या भागाचे नुकसान झाले आहे. घटनेची माहिती मिळताच, कासारवडवली वाहतूक पोलीस, ठामपा अग्निशमन दल आणि प्रादेशिक आपत्ती व्यवस्थापन विभागाने धाव घेतली. अपघातग्रस्त टेम्पो एका बाजूला असल्याने वाहतूक कोंडी झाली नसल्याची माहिती आपत्ती व्यवस्थापन विभागाने दिली.