भिवंडी : नाशिक येथून मुंबईच्या दिशेने शालेय सहलीसाठी निघालेल्या खाजगी लक्झरी बसला भिवंडी तालुक्यातील पडघा येथे सोमवारी सकाळी पडघा टोलनाका परिसरात अपघात झाला आहे. या अपघातात बसचे नुकसान झाले. पण सुदैवाने बसमधील कोणीही जखमी न झाल्याने सर्वांनी सुटकेचा निःश्वास सोडला आहे.
नाशिक जिल्ह्यातील माध्यमिक विद्यालय बिलोली या शाळेतील विद्यार्थी-विद्यार्थिनी यांची सहल ठाणे येथील टीकुजिनी वाडी या ठिकाणी आयोजित करण्यात आली होती. त्यासाठी दोन स्वतंत्र खाजगी लक्झरी बसमधून येथील विद्यार्थी सहलीसाठी निघाले होते. तालुक्यातील पडघा येथील टोलनाका परिसरात बस आली असता चालकाचे बसवरील नियंत्रण सुटल्याने बस पुढील ट्रकवर आदळली.
या अपघातात बसच्या समोरील बाजूची काच फुटली. परंतु बसमधील ५५ विद्यार्थिनी यांना कोणतीही दुखापत झाली नाही. या घटनेची माहिती मिळताच स्थानिक पडघा पोलिस रुग्णवाहिकेसह दाखल झाले होते. या घटनेची नोंद पडघा पोलीस ठाण्यात करण्यात आली आहे.