भिवंडी: भिवंडी शहरातील साई नगर ताडाळी अंजुरफाटा रोड येथे गुरुवारी झालेल्या क्षुल्लक वादातून मुलांच्या दोन गटात हाणामारी झाली होती , या भांडणाचा राग मनात धरून शुक्रवारी रात्री जाब विचारण्यासाठी गेलेल्या युवकांवर तीन ते चार जणांनी ऍसिड फेकून हल्ला केला. ज्यामध्ये 6 जण जखमी झाले आहेत. या ऍसिड हल्ल्यातील जखमींपैकी तिघांची प्रकृती गंभीर असल्याने त्यांना पुढील उपचारासाठी ठाणे येथील रुग्णालयात हलविण्यात आले आहे .
शहरातील ताडाळी साईनगर येथील निखिल शर्मा हा गुरुवारी कामावरून घरी परतत असताना त्या परिसरातच राहणाऱ्या एका व्यक्तीचा धक्का लागल्याने या कारणातून मुलांच्या दोन गटात हाणामारी झाली होती ,त्यानंतर निखिल शर्मा व त्याचे मित्र अभिषेक देशमुख ,अभिषेक शर्मा ,रोहित पांडे व सुरज पटेल हे मारहाण का केली , याचा जाब विचारण्यासाठी त्या व्यक्तीच्या घरी गेले असता त्यांच्यात बाचाबाची झाली व मुलांच्या दोन गटात हाणामारी झाली त्या वेळी एका गटाकडून बेसावध असणाऱ्या या मुलांवर समोरच्या तीन ते चार व्यक्तींनी ऍसिड फेकले . या अचानक झालेल्या हल्ल्याने हे 5 ते 6 युवक भाजल्याने व्हीव्हळत तेथून पळत आपल्या घराकडे आले. या भांडणात एक महिला देखील जखमी झाली असल्याचे समजते . या ऍसिड हल्ल्यातील जखमींना स्वर्गीय इंदिरा गांधी स्मृती उपजिल्हा रुग्णालयात उपचारासाठी दाखल केले आहे तर अभिषेक देशमुख ,निखिल शर्मा व अभिषेक शर्मा यांना गंभीर जखम असल्याने त्यांना उपचारासाठी ठाणे कळवा रुग्णालय या ठिकाणी रवाना केले असून स्थानिक नारपोली पोलिसांनी या जखमी युवकांचे जबाब नोंदवून तक्रार नोंदविण्याची प्रक्रिया सुरू केली आहे.