भिवंडी: एका सहा वर्षीय चिमुरडीची हत्या करून मृतदेह प्लास्टिकच्या बादलीत कोंबून आरोपी फरार झाल्याची घटना शहरातील फेणेगाव धापसी पाडा परिसरातील एका पत्र्याच्या चाळीत घडली आहे. शुक्रवारी परिसरात दुर्गंधी पसरल्यानंतर ही दुर्दैवी घटना समोर आली आहे. या घटनेने परिसरात हळहळ व्यक्त केली जात आहे.
हत्या झालेल्या मुलीचे आई-वडील हे दोघेही गोदामामध्ये काम करण्यासाठी जातात. १३ सप्टेंबर रोजी आई-वडील कामासाठी घरातून निघून गेले होते. हत्या झालेल्या सहा वर्षीय मुली सोबत तिचा नऊ वर्षाचा भाऊ घरी होता.चिमूरडी सकाळ पासूनच बेपत्ता असताना सायंकाळी आई वडील घरी आल्यानंतर मुलाने बहीण दिसत नसल्याची माहिती आई वडिलांना दिली. त्यानंतर आई-वडिलांनी परिसरात शोध घेत रात्री उशिरा भिवंडी शहर पोलीस ठाण्यात मुलीच्या हरवल्याची नोंद केली. मुलगी अल्पवयीन असल्याने पोलिसांनी अपहरणाचा गुन्हा दाखल करून शोध घेण्यास सुरवात केली होती. नजीकच्या वऱ्हाळा तलावामध्ये सुद्धा पोलिसांनी सर्च ऑपरेशन केले होते.मात्र चिमुरडीचा शोध लागला नव्हता.
शुक्रवारी दुपारी परिसरात दुर्गंधी येत असल्याची माहिती स्थानिकांनी पोलिसांना दिल्यानंतर भिवंडी शहर पोलीस ठाण्याचे वरिष्ठ पोलीस निरीक्षक चेतन काकडे व पोलीस पथक घटनास्थळी दाखल झाले. त्यांनी परिसरात शोध घेतला असता एका चाळीतील बंद असलेल्या खोली मध्ये प्लास्टिकच्या बकेट मध्ये मुलीचा मृतदेह कोंबून ठेवल्याचे आढळून आले. पोलिसांनी तात्काळ घटनेचा पंचनामा करून मृतदेह उत्तरीय तपासणीसाठी मुंबई येथील जे जे रुग्णालयात रवाना केला आहे.
घटनस्थळी ठाणे येथील ठसे तज्ञ पथक सुध्दा दाखल झाले असून, भिवंडी शहर पोलिस ठाण्यात कुटुंबीयांनी दिलेल्या तक्रारी वरून हत्येचा गुन्हा दाखल करण्यात आला आहे. मृतदेह शवविच्छेदन अहवालामध्ये ज्या गोष्टी समोर येतील त्यानुसार गुन्ह्याची व्याप्ती वाढवली जाईल असे सांगत आरोपीचा शोध घेण्यासाठी पोलिसांची तीन पथके ठिकठिकाणी रवाना केली असल्याची माहिती पोलीस उपायुक्त नवनाथ ढवळे यांनी दिली आहे.