व्हॉटसअॅपच्या माध्यमातून उघड झाली सहा कोटींची फसवणूक

व्हॉईस ओव्हर इंटरनेट प्रोटोकॉल (व्हीओआयपी) या सेवेद्वारे अमेरिकन नागरिकांना गंडा घालून त्यांच्याकडून पाच कोटी ९१ लाख ५० हजार ७०४ इतकी

- जितेंंद्र कालेकर/ऑनलाइन लोकमतठाणे, दि. 11 - व्हॉईस ओव्हर इंटरनेट प्रोटोकॉल (व्हीओआयपी) या सेवेद्वारे अमेरिकन नागरिकांना गंडा घालून त्यांच्याकडून पाच कोटी ९१ लाख ५० हजार ७०४ इतकी रक्कम उकळल्याचे ७२ पैकी सात जणांच्या चौकशीत उघड झाले आहे. त्यांनी बनविलेल्या व्हॉटस् अ‍ॅप ग्रुपच्या सखोल पडताळणीमध्ये ही माहिती उघड झाल्याचे गुन्हे अन्वेषण विभागाने न्यायालयात सांगितले.संपूर्ण देशातच नव्हे तर अमेरिकेतही खळबळ उडवून देणाऱ्या या फसवणुकीच्या तपासातील एकेक धागा उलगडतांना पोलीसही चक्रावले आहेत. ५ आॅक्टोबर रोजी मीरा रोड येथील कॉल सेंटरवर धाड टाकून ७७२ जणांना ताब्यात घेण्यात आले. त्यापैकी ७२ जणांना अटक झाली. त्यांच्यापैकीच महत्त्वाच्या पदावरील कर्मचाऱ्यांनी मोबाईलवर व्हॉटस् अ‍ॅप ग्रुप बनविला होता. त्याद्वारे किती परदेशी लोकांकडून किती डॉलर पैसे काढले, याच्या नोंदीही त्यांच्याकडून हस्तगत केलेल्या मोबाईलमधून सहायक पोलीस आयुक्त मुमूंद हातोटे, वरिष्ठ निरीक्षक नितिन ठाकरे यांच्या पथकाला मिळाल्या आहेत. नवोज उर्फ कबीर वर्धन गुप्ता या व्यवस्थापकाच्या ग्रुपने दोन लाख १६ हजार ६६६ डॉलर (एक कोटी ४३ लाख रुपये) अमेरिकन नागरिकांकडून उकळल्याचे स्पष्ट झाले. गोविंद ठाकूर आणि अंकित गुप्ता या व्यवस्थापकांकडून तीन लाख ४६ हजार ३९५ ची कॉल सेंटरची सामुग्री जप्त केली. त्यांनी दीड लाख डॉलर अमेरिकन नागरिकांकडून उकळल्याचे त्यांच्या व्हॉटसअ‍ॅप ग्रुपमधून उघड झाले. तर अर्जून वासूदेव या व्यवस्थापकाच्या चौकशीतूनही बरीच माहिती उघड झाली. त्याच्याकडून कॉलसेंटर कर्मचाऱ्यांच्या पगाराची ८५ हजार ३७० इतकी रोकड आणि काही उपकरणे जप्त केली. १० सप्टेंबर ते ४ आॅक्टोबर २०१६ या एक अवघ्या महिन्यांच्या कालावधीत त्याच्या टीमने एक लाख ७४ हजार ४०५ डॉलर (एक कोटी १५ लाख १० हजार ७३० रुपये) इतकी फसवणूक केली आहे. जॉनसन डॉन्टीस या आयटी एक्सपर्टच्या ग्रुपमधून एक लाख ६५ हजार ४३९ डॉलरची (एक कोटी नऊ लाख १८ हजार ९७४ रुपये) फसवणूक झाल्याचे उघड झाले आहे. तर अविनाश आणि हिम्मत राजपूत यांच्या ग्रुपने एक लाख ८९ हजार ७२० डॉलर अर्थात एक कोटी २५ लाख २१ हजार रुपये अमेरिकन नागरिकांकडून उकळले असून या सात जणांच्या चौकशीतून त्यांनी पाच कोटी ९१ लाख ५० हजार ७०४ रुपयांची फसवणूक केल्याचे स्पष्ट झाले आहे.ठाणे ते अहमदाबाद कनेक्शनया संपूर्ण प्रकरणाची पाळेमुळे ही ठाणे ते अहमदाबाद, दिल्ली आणि अमेरिकेपर्यंत आहेत. त्यामुळे या सर्व ठिकाणी पोलिसांना तपास करावा लागणार आहे. पहिले तीन मजले ‘रग्गड कमाई’चेमीरा रोड येथील पेनकरपाडा हरी ओम आयटी पार्क, बाले हाऊस, युनिवर्सल आऊट सोर्सिंग सर्व्हिसेस आणि ओसवाल हाऊस अशा तीन इमारतींमधील सात कॉल सेंटरवर पोलिसांनी धाडसत्र राबविले. त्यातील पेनकरपाडा हरी ओम आयटी पार्कच्या सातमजली इमारतीमध्ये तर कमाईप्रमाणे विभागणी केली होती. पहिल्या तीन मजल्यावरील कथित कर्मचारी हे महिन्याला तीन ते पाच लाख डॉलर इतकी ‘कमाई’ कॉल सेंटरला करुन देत होते. यामध्ये आयटी एक्सपर्टचा मोठा समावेश होता. तिकडून मिळालेले पैसे ते अहमदाबादला ट्रान्सफर करीत होते. त्यामुळे या कर्मचाऱ्यांचे पगारही मोठया वेगाने वाढत होते. तर चार ते सहा मजल्यावरुन एक ते तीन लाख प्रति महिना डॉलर ‘कमाई’ करणारा कर्मचारी वर्ग तैनात केलेला होता. शेवटच्या सातव्या मजल्यावर मात्र त्यांनी गिऱ्हाईकांना जाळ्यात कसे ओढायचे, अमेरिकन भाषेची लकब आणि कसब शिकविण्याचे प्रशिक्षण केंद्र उभारले होते. आता या टोळीने कोणाककडून आणि कसा पैसा हवाला मार्फत स्वीकारला याची चौकशी करण्यात येत असल्याचे पोलिसांनी सांगितले.