सदानंद नाईक
उल्हासनगर : कॅम्प नं-४, एसएसटी कॉलेज समोरची झाडाझुडपात रेकॉर्डवरील गुन्हेगार स्वप्नील कानडे याचा शनिवारी रात्री खून झाल्याचा प्रकार उघड झाला. याप्रकरणी विठ्ठलवाडी पोलीस ठाण्यात गुन्हा दाखल झाला असून रात्री पर्यंत गुन्हेगारांना अटक करण्याचे संकेत वरिष्ठ पोलीस निरीक्षक संजय गायकवाड यांनी दिले आहे.
उल्हासनागरात गुन्हेगारीचा आलेख उंच जात असतांना कॅम्प नं-४, एसएसटी कॉलेज समोरील झाडाझुडपाच्या जागेत एक मृतदेह पडल्याची माहिती विठ्ठलवाडी पोलिसांना मिळाली. पोलिसांनी घटनास्थळी जाऊन मृतदेहाची पाहणी केली असता, माणेरेगावात राहणारा व पोलीस रेकॉर्डवरील गुन्हेगार स्वप्नील कानडे याचा मृतदेह असल्याचे उघड झाले. पोलिसांनी घटनास्थळाचा पंचनामा करून मृतदेह उत्तर तपासणीसाठी मध्यवर्ती रुग्णालयात पाठविला. जबर मारहाण झाल्यानंतर कानडे याचा मृत्यू झाला असावा असा संशय पोलिसांनी व्यक्त केला. या प्रकरणी पोलिसानी अज्ञात इसमावर खुनाचा गुन्हा दाखल केला. तसेच खुनाचा छेडा लावण्यासाठी पोलीस पथके रवाना केली. रविवारी रात्री पर्यन्त गुन्हेगारांना अटक करण्याचे संकेत वरिष्ठ पोलीस निरीक्षक संजय गायकवाड यांनी दिले आहे.
पोलीस रेकॉर्डवरील गुन्हेगार स्वप्नील कानडे याचा खून झाल्याने, परिसरात भीतीचे वातावरण आहे. मृत कानडे याचा बदला घेण्यासाठी खून खराबा होऊ नये म्हणून पोलीस सतर्क असून कानडे याचा वैर भावनेतून खून झाला असावा. असे बोलले जात आहे. अधिक तपास विठ्ठलवाडी पोलीस करीत आहेत.