लोकमत न्यूज नेटवर्क
उल्हासनगर : स्टेशनच्या दोन्ही बाजूला उभारण्यात आलेल्या स्कायवॉकची दुरवस्था झाल्याने गर्दुल्ले, भुरटे चोर आदींच्या उपद्रवापासून स्कायवॉक मुक्त करण्यासाठी महापालिकेकडे हस्तांतरित करण्याचे साकडे एमएमआरडीएचे अभियंता पी. जे. भांगरे यांना मनसेने घातले. गुन्हेगारांचा अड्डा झालेल्या स्कायवॉकबाबत निर्णय न घेतल्यास आंदोलनाचा इशारा मनसेने दिला.
उल्हासनगर रेल्वे स्टेशनच्या दोन्ही बाजूला नागरिकांच्या सोयीसाठी एमएमआरडीएने कोट्यवधी रुपये खर्चून स्कायवॉक बांधला. मात्र, स्कायवॉकची नियमित दुरुस्ती न झाल्याने, स्कायवॉकची दुरवस्था होऊन गर्दुल्ले, भुरटे चोरांचा अड्डा झाला. गेल्या आठवड्यात रात्रीचे ९ वाजता स्कायवॉकवर उभ्या असलेल्या १४ वर्षाच्या मुलीला ठार मारण्याची धमकी देऊन, एक तरुणाने रेल्वेच्या बंद कॉर्टर्समध्ये नेऊन बलात्कार केल्याने एकच खळबळ उडाली. दरम्यान, स्कायवॉकची देखभाल महापालिकेकडे हस्तांतरित करण्याच्या मागणीने जोर पकडला असून मनसेचे शहराध्यक्ष बंडू देशमुख यांच्या नेतृत्वाखाली पक्षाच्या शिष्टमंडळाने शुक्रवारी एमएमआरडीएचे मुख्य अभियंता भांगरे यांची भेट घेतली.
स्टेशनच्या दोन्ही बाजूच्या स्कायवॉकवरील पत्रे, लोखंडी पाईप आदी साहित्य चोरीला गेले असून साफसफाईचे तीनतेरा वाजल्याने दुर्गंधीचे साम्राज्य पसरले आहे. स्कायवॉक पालिकेकडे हस्तांतरित केल्यास साफसफाई व निगा राखली जाईल, असे देशमुख म्हणाले. स्कायवॉकबाबत वेळीच निर्णय न घेतल्यास एमएमआरडीए आयुक्तांसमोर आंदोलनाचा इशारा देशमुख यांनी दिला. शिष्टमंडळामध्ये शालीग्राम सोनवणे, मुकेश सेठपलानी, तन्मेश देशमुख आदींचा समावेश होता.