लोकमत न्यूज नेटवर्क
मीरारोड: मीरा भाईंदर शहरात गुरुवारी रात्री व शुक्रवारी दिवसभर जोरदार पाऊस पडल्यामुळे शहरातील बहुसंख्य परिसर पाण्याखाली गेला होता. घोडबंदर मार्ग पाण्याखाली गेल्याने वाहतूक जवळपास ठप्प झाली होती .
गुरुवारी रात्री पासून सुरु झालेल्या मुसळधार पावसाने शुक्रवारी चांगलेच झोडपून काढले . धुंवाधार पावसा मुळे शहरातील बहुसंख्य परिसर पाण्याखाली गेलेच शिवाय घोडबंदर महामार्ग सुद्धा पाण्यात बुडाल्याने वाहतूक जवळपास ठप्प झाली होती . शहरात सकाळी १० ते दुपारी १ ह्या तीन तासात सुमारे ८३ मिलीमीटर पावसाची नोंद झाल्याचे सांगण्यात आले .
भाईंदरच्या बेकरी गल्ली , नारायण नगर , राई - मोरवा मार्ग, बाळाराम पाटील मार्ग , तलाव मार्ग सह अनेक भागात पाणी तुंबले होते . मीरारोडच्या शांती नगर , शीतल नगर , अमिषा पार्क , कृष्ण स्थळ, गीता नगर , हटकेश , मुन्शी कम्पाऊंड , माशाचा पाडा मार्ग परिसर , ग्रीन व्हिलेज आदी अनेक परिसरात मोठ्या प्रमाणात पाणी साचले होते .
अनेक लोकांच्या घरात तसेच दुकान - व्यवसायायिक जागेत सांडपाणी व पावसाचे पाणी शिरले . शहरातील वाहतूक आणि जनजीवन विस्कळीत झाले होते . सुदैवाने दुपार नंतर पावसाचा जोर ओसरल्याने लोकांना दिलासा मिळाला .
महापालिकेच्या नाले सफाईची पुन्हा पोलखोल झालीच शिवाय शहरात मोठ्या प्रमाणात चालणारी भरणी सुद्धा पुन्हा चिंतेचा विषय असल्याचे स्पष्ट झाले .