अंबरनाथ : अनैसर्गिक संबंधांचा हव्यास एका इसमाच्या जीवावर बेतल्याची घटना अंबरनाथमध्ये घडली आहे. या इसमाने दारू पाजण्याच्या बहाण्याने सहकाऱ्याला घरी आणत त्याच्याशी अनैसर्गिक संबंध ठेवण्याचा प्रयत्न केला. मात्र चिडलेल्या सहकाऱ्याने थेट त्याचा गळा चिरून त्याची हत्या केली.
अंबरनाथच्या चिखलोली पाड्यातील मगर चाळीत कृष्णानंद मुनियन राहत होता. तो एमआयडीसीतील एका कंपनीत फेब्रिकेशनचे काम करत होता. रविवारी रात्री कंपनीतून येताना त्याने कंपनीतील एका सहकाऱ्याला दारू पाजण्याच्या निमित्ताने घरी आणले. तसेच दारू पिऊन झाल्यानंतर उशीर झाल्याने तिथेच मुक्काम करण्यास सांगितले. यानंतर रात्रीच्या सुमारास कृष्णानंद याने या सहकाऱ्याशी लगट करण्याचा प्रयत्न करत अनैसर्गिक संबंध प्रस्थापित करण्याचा प्रयत्न केला. त्यामुळे चिडलेल्या या सहकाऱ्याने त्याच्याच घरातील चाकू घेऊन कृष्णानंद याचा गळा चिरला आणि तिथून निघून गेला.
सकाळी कृष्णानंदच्या शेजारी राहणाऱ्या महिलेने पाणी भरण्यासाठी त्याला उठवण्याचा प्रयत्न केला असता त्याने दार उघडले नाही. बराच वेळ दार उघडत नसल्यामुळे अखेर दार तोडून घरात प्रवेश केला असता कृष्णानंदचा मृतदेह रक्ताच्या थारोळ्यात पडलेला त्यांना आढळून आला. याबाबत पोलिसांना माहिती देताच शिवाजीनगर पोलिसांनी श्वान पथकासह घटनास्थळी भाव घेतली. यानंतर काही वेळातच संशयित आरोपीलाही पोलिसांनी ताब्यात घेतले. त्याने पोलिसांना दिलेल्या माहितीनुसार कृष्णानंद याने अनैसर्गिक संबंध ठेवण्याचा प्रयत्न केल्याने चिडून त्याने ही हत्या केल्याची कबुली दिली.