मीरारोड - खोट्या तक्रारी करून नंतर त्या मागे घेणे, अधिकाऱ्यांना खंडणी साठी त्रास देणे, ईडीची बनावट नोटीस दाखवून धमकावणे अश्या विविध गुन्हेगारी कारवाया करणाऱ्या भाईंदरच्या राजू शाह उर्फ राजू जैन उर्फ राजेंद्र जैन ह्या व्यक्ती विरुद्ध महाराष्ट्र संघटित गुन्हेगारी नियंत्रण अधिनियम अर्थात मकोका खाली कारवाई करण्याची मागणी विधान परिषदेचे विरोधीपक्ष नेते अंबादास दानवे यांनी मुख्यमंत्री देवेंद्र फडणवीस यांच्या कडे केली आहे.
दानवे यांनी पत्रात म्हटले आहे कि, राजू शाह यांनी गेल्या अनेक वर्षां पासून महापालिका व पोलीस अधिकारी, व्यावसायिक, उद्योजक यांना आर्थिक हेतूने त्रास दिला आहे. शाह वर १२ केस असून काही प्रकरणात शिक्षा झाली आहे. उच्च न्यायालय व लोकायुक्त यांनी ब्लॅकमेलर म्हणून त्यांच्या तक्रारी फेटाळून लावल्या आहेत.
ईडीच्या चुकीच्या नोटीस प्रकरणी शाह यांना अटक झाली आहे. महापालिका अधिकाऱ्यां विरुद्ध खंडणी मागणे, खोट्या तक्रारी दाखल करणे व नंतर त्या मागे घेणे अश्या पद्धतीने गुन्हेगारी कारवाया केल्या आहेत. आदिवासींची जमीन हडपणेचा गंभीर आरोप, हमीरमल टॉवर हि अनधिकृत इमारत उभारली आहे.
नागरिक, संस्था यांनी शाह विरुद्ध तक्रारी करून देखील कोणतीच कारवाई न केल्याने प्रशासन व पोलिसांवर नागरिकांचा विश्वास कमी होत आहे. या प्रकरणी चौकशी करून मकोका लावण्याची मागणी विरोधेपक्ष नेते दानवे यांनी मुख्यमंत्री यांच्या कडे केली आहे.
तर राजू शाह यांनी सांगितले कि, दानवे यांची तक्रार खोटी असून आपण दोन्ही सभागृहांच्या सभापतीं कडे दानवे यांची तक्रार केली आहे. एनिमी प्रॉपर्टी घोटाळा मांडण्यासाठी दानवे यांचे सचिव एच. एस. मोरे यांनी पैसे, मोबाईल, दारूच्या बाटल्या मागितल्याचे व्हॉट्सएप स्क्रिनशॉट तक्रारी सोबत दिले आहेत. युएलसी व एनिमी प्रॉपर्टी घोटाळा दडपण्यासाठी पैसे पुरवल्याचे समजल्याचे शाह यांनी तक्रारीत नमूद केलं आहे.