कल्याण : पश्चिमेकडील रेल्वे स्थानक परिसरात चायनीज खाद्यपदार्थ विक्रीचा व्यवसाय करणार्या सरफराज सय्यद याच्यावर भररस्त्यात गोळीबार झाल्याची घटना रविवारी दुपारच्या सुमारास घडली. हा प्रकार बैलबाजार पोलीस चौकीजवळच घडला असून गोळीबारात डोक्यालागोळी लागल्याने तो गंभीर जखमी झाला आहे. जीवन शिरसाठ याने गोळीबार केल्याचा आरोप करण्यात आला आहे.सय्यद याचा पाठलाग करून त्याला गोळी मारण्यात आली आहे. त्यास उपचारार्थ नजीकच्या खाजगी रुग्णालयात दाखल करण्यात आले आहे. ही घटना पोलीस चौकीजवळच घडल्याने कायदा सुव्यवस्थेचा प्रश्न ऐरणीवर आला आहे. सय्यद हा अनेक वर्षांपासून रेल्वे स्थानकपरिसरात चायनीज पदार्थ विक्रीचा व्यवसाय करीत आहे. मात्र, काही दिवसांपासून याच व्यवसायात उतरलेल्या जीवनने त्याला शह देण्याचा प्रयत्न केला. यावरून त्यांच्यात व्यावसायिक स्पर्धा रंगली होती. यातूनच त्याने आपल्यावर खुनी हल्ला केल्याचा आरोप सय्यदने पोलिसांकडे दिलेल्या जबानीत केला आहे. त्याच्यावर शस्त्रक्रिया करण्यात आली असून सध्या त्याची प्रकृती स्थिर असल्याचे पोलिसांनी सांगितले. याप्रकरणी एमएफसी पोलीस ठाण्यात गुन्हा दाखल करण्यात आला आहे.
कल्याणात गोळीबार चायनीज व्यावसायिक जखमी पोलीस चौकीजवळच घडला प्रकार
By admin | Updated: June 8, 2015 01:55 IST