मिरा भाईंदरमध्ये '७० पार'चा नारा भाजपने केला खरा; आ. नरेंद्र मेहतांची मंत्री सरनाईकांवर मात

Mira Bhayander Municipal Election Results 2026: विकासकामे, विविध उपक्रम लोकांपर्यंत पोहोचवण्यात शिंदेसेना अपयशी; जनसंपर्क न वाढविल्याचा बसला फटका

Mira Bhayander Municipal Election Results 2026: मिरा भाईंदर पालिका निवडणुकीत भाजपने सत्ता राखलीच नाही, तर शिंदेसेनेला भुईसपाट करून आपला ७० पारचा नारादेखील खरा करून दाखवला. शिंदेसेनेचे परिवहनमंत्री प्रताप सरनाईक यांचे भाजप आमदार नरेंद्र मेहता यांनी पानिपत केले. 

मिरा भाईंदरमध्ये गेल्या काही वर्षात मंत्री सरनाईक यांनी विकासकामांसह शिंदेसेना वाढवण्यावर भर देत बरेच नगरसेवक पक्षात घेतले. शहरात त्यांनी स्वतःचे वातावरण निर्माण करण्यासाठी केलेल्या विकासकामे, धार्मिक आणि सांस्कृतिक कार्यक्रमाचे आयोजन व विविध समाजांना सोबत जोडण्याचा प्रयत्न केला. मात्र, सरनाईकांसह शिंदेसेनेच्या पदाधिकारी - शिवसैनिकांना ही कामे आणि कार्यक्रम हे सामान्य लोकांपर्यंत पोहोचवणे जमले नाही. लोकांशी संपर्क वाढविण्यावर भर दिला गेला नाही. पदे वाटली. मात्र, पक्ष संघटनांची बांधणी आणि सक्रियपणे तळागाळात काम करणारे कमी होते. सर्व काही मंत्री सरनाईक यांच्यावरच अवलंबून होते. उद्धवसेनेच्या स्थानिक नेत्यांना भाजपकडून रसद दिली जात असल्याची व शिंदेसेनेच्या मराठी प्राबल्य असलेल्या प्रभागांमध्ये उद्धवसेना व मनसे उमेदवारांचा फटका बसेल याची कल्पना सरनाईक यांना आली होती. मात्र, त्यावर उपाय करण्यात ते आणि प्रस्थापित उमेदवार कमी पडले.

मराठी मुद्द्याचाही परिणाम

मेहतांनी उमेदवारी देताना त्यांचे विरोधक व नको असलेल्यांना बाजूला केल्याने अनेक माजी नगरसेवक- पदाधिकारी यांनी बंडखोरी व नाराजी व्यक्त केली; परंतु त्यांनी भाजपाची संघटन शक्ती व नियोजनासह बूथ स्तरापर्यंतच्या मतांची आकडेमोड केली. शिवाय दोन्ही ठाकरे बंधूंच्या मराठीच्या मुद्द्याचा विपरीत परिणामदेखील शहरातील भाजपच्या पारंपरिक राजस्थानी, गुजराती, उत्तर भारतीय, जैन आदी मतदारांवर पडल्याचा भाजपला फायदा झाला. ठाकरे बंधू एकत्र आल्याचा फायदा मेहतांनी पुरेपूर उचलला आणि शिंदेसेनेला नमवले.