ठाणे - ठाण्यामध्ये एक धक्कादायक घटना घडली आहे. झोपडीवर ट्रक उलटल्याने एक मुलगी गंभीर जखमी झाल्याची घटना समोर आली आहे. सकाळी ६:१४ वाजताच्या सुमारास आपत्ती व्यवस्थापन कक्षामध्ये मिळालेल्या माहितीनुसार मुंबई-नाशिक हायवे वर माजिवडा ब्रिजजवळ, रुस्तमजी समोर, लोढा येथे मुंबईकडून नाशिककडे जाणाऱ्या वाहिनीवरती एका ट्रक चालकाचा वाहनावरील ताबा सुटल्याने रस्त्याच्या असलेल्या एका झोपडी वरती पलटी झाला. यामध्ये झोपडीतील मुलगी त्या ट्रक खाली अडकली होती.
घटनास्थळी आपत्ती व्यवस्थापन कक्षाचे कर्मचारी १ पिकअप वाहन, १- बाईक ॲम्बुलन्स, कापूरबावडी वाहतूक पोलीस कर्मचारी, कापूरबावडी पोलीस कर्मचारी- २ क्रेन वाहने, 108 रुग्णवाहिका व अग्निशमन दलाचे जवान १ रेस्क्यू वाहनासह उपस्थित आहेत. या ट्रक खाली अडकलेल्या मुलीला क्रेनच्या मदतीने ट्रक उचलून बाहेर काढण्यात आले आहे. तिला कापूरबावडी पोलीस कर्मचारी यांनी रुग्णवाहिकेच्या सहाय्याने जिल्हा शासकीय रुग्णालय येथे उपचार करता दाखल केले आहे. मधु भाटी असं या १४ वर्षीय मुलीचं नाव आहे.