अंबरनाथ : दारू पिऊन आईला सतार मारहाण करणाऱ्या बापाची मुलाने हत्या केल्याचा प्रकार अंबरनाथमध्ये घडला आहे. या घटनेनंतर अंबरनाथ पश्चिम पोलिसांनी मुलाला अटक केली आहे.
अंबरनाथ पश्चिमेच्या बुवापाडा परिसरात राजेश वर्मा हा त्याची पत्नी अनिता आणि १९ वर्षांचा मुलगा प्रकाश याच्यासह वास्तव्याला होता. राजेशला दारूचे व्यसन होते आणि त्यातूनच नवरा बायकोमध्ये सतत वाद होऊन राजेश हा पत्नी अनिताला मारहाण करत होता. ही बाब मुलगा प्रकाश याला खटकत असल्याने प्रकाश आणि राजेश यांच्यातही वाद होत होते. रविवारीही राजेश हा दारू पिऊन पत्नी अनिताला मारहाण करत असताना मुलगा प्रकाश याने त्याला अडवण्याचा प्रयत्न केला. मात्र तरीही तो मारहाण करतच असल्यामुळे प्रकाशने घरातील चाकू घेऊन राजेश याच्या छातीत खुपसला.
या घटनेत राजेश याचा मृत्यू झाला. यानंतर अंबरनाथ पश्चिम पोलिसांनी घटनास्थळी धाव घेत राजेश वर्मा याचा मृतदेह उल्हासनगरच्या मध्यवर्ती रुग्णालयात शवविच्छेदनासाठी पाठवला. तर पत्नी अनिता वर्मा हिच्या फिर्यादीवरून मुलगा प्रकाश वर्मा याच्याविरोधात पोलिसांनी खुनाचा गुन्हा दाखल करत त्याला अटक केल्याची माहिती अंबरनाथ पोलीस ठाण्याचे वरिष्ठ पोलीस निरीक्षक राजेंद्र कोते यांनी दिली आहे.
सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"