मीरारोड - कोरोनाच्या वाढत्या रुग्णां मुळे आता मीरा भाईंदर महापालिकेने कारवाईला सुरवात केली असून वरसावे नाका , घोडबंदर मार्गावरील एक्स्प्रेस इन हे मोठे हॉटेल कोरोना रुग्ण आढळून आल्याने पालिकेने सील केले आहे . सदर हॉटेल मधील २१ कर्मचाऱ्यांना कोरोनाची लागण झाल्याचे समोर आल्याने त्यांच्या संपर्कात आलेल्या असंख्य ग्राहकांचा शोध घेणे अवघड होणार आहे .मीरा भाईंदर मध्ये कोरोना रुग्णांचे प्रमाण मध्यंतरीच्या काळात कमी झाल्या नंतर महापालिका व पोलीस प्रशासना कडून सुद्धा नियमांचे उल्लंघन करणाऱ्यांवर कारवाई करणे बंद झाले . दुसरीकडे बेशिस्त नागरिकांसह अनेक नगरसेवक , राजकारणी देखील सर्रास नियमांचे उल्लंघन करत विना मास्क वावरत आहेत . त्यातूनच पुन्हा कोरोना रुग्णांची संख्या वाढू लागली आहे .त्यातच नेहमी गर्दी असणाऱ्या वरसावे नाका , घोडबंदर मार्गावरील एक्स्प्रेस इन ह्या बड्या हॉटेलातील २१ कर्मचारी कोरोनाग्रस्त आढळून आले . त्यांचा कोरोना चाचणी अहवाल पॉझिटिव्ह आल्याने पालिकेचे प्रभाग अधिकारी स्वप्नील सावंत यांनी १८ फेब्रुवारी पासून ४ मार्च पर्यंत हॉटेल इमारतच सील केली आहे . तसे आदेश त्यांनी सदर हॉटेलच्या दर्शनी भागात लावले आहेत .ह्या घटनेने खळबळ उडाली असून सदर हॉटेलात रोज येणाऱ्या असंख्य ग्राहकां शोधणे अवघड झाले आहे . कारण कोरोनाग्रस्त हॉटेल कर्मचाऱ्यांच्या संपर्कात आलेल्या ग्राहकांचा शोध घेऊन त्यांची तपासणी करणे आवश्यक आहे . शासनाचे हॉटेल व कर्मचाऱ्यांसाठी दिलेले निर्देश स्पष्ट असले तरी त्याचे काटेकोर पालन केले जात नाहीत . खाण्या - पिण्या साठी आलेल्या लोकांना मास्क काढून ठेवण्या शिवाय पर्याय नसतो . त्यामुळे हॉटेल - बार हि कोरोना संसर्ग झपाट्याने पसरण्याची केंद्र ठरण्याची भीती व्यक्त होत आहे .