लोकमत न्यूज नेटवर्क
भिवंडी : भिवंडी महानगरपालिकेची बनावट बांधकाम परवानगीसह असेसमेंट नोटीस आणि मूळ जमीन मालक यांचे बनावट कुलमुखत्यारपत्र तयार करून इमारतीमधील २४ दुकाने आणि ३४ सदनिकांच्या मूळ मालकांना अंधारात ठेवले आणि त्यानंतर ते पाच कोटी रुपयात विक्री करणाऱ्या बाप-लेकाच्या जोडीला शांतीनगर पोलिसांनी गुन्हा दाखल झाल्यानंतर दीड वर्षानंतर अटक केली आहे.
किशोर रतिलाल सूचक, कुणाल सूचक अशी अटक केलेल्या बाप-लेकांची नावे आहेत, तर भरत सूचक हा मुख्य आरोपी अजूनही फरार असून, पोलीस त्याचा शोध घेत आहे. भरत सूचक हा भिवंडीतील नजराणा कंपाऊंड परिसरात राहणारा आहे, तर अटक आरोपी बांधकाम व्यावसायिक ठाण्यात राहतात. भिवंडीतील इद्रिस अब्दुल हमीद शेख (वय ४० ) यांची वडिलोपार्जित जमीन भिवंडीतील टेमघर-पाईपलाईन भागात मुख्य रस्त्यावर आहे. ही जमीन इद्रिसच्या वडिलांनी बांधकाम विकासक भरत सूचक यास भागीदारी करार करून दिली होती. मात्र, इमारत उभारतांना २००१ साली मूळ मालकाला डावलून बांधकाम सुरू केले. तसेच पूर्वीच्या चाळीतील भाडेकरूंनाही डावलल्याने १३ नोव्हेंबर २००१ रोजी शांतीनगर पोलीस ठाण्यात लेखी तक्रार दिली होती. तरीही मुख्य आरोपी भरत सूचक आणि दोघा आरोपी बाप-लेकांनी आपसात संगनमत करून मूळ जमीन मालकांच्या नावाने बनावट कुलमुखत्र्यातर पत्र, साठेकरार करून त्यावर बनावट सह्या केल्याचे निष्पन्न झाले होते.
या दरम्यान, आरोपींनी दोन मजली आणि त्यांनतर आणखी एक मजला अशी तीन मजली इमारत पालिकेची बनावट परवानगी व इतर इतर कागदपत्र तयार करून उभारली आहे. यामुळे जमीन मालक इद्रिस यांनी २००९ साली लोकआयुक्तांकडे धाव घेऊन घडलेल्या प्रकाराबाबत लेखी पुरावे सादर केले. यावर सुनावणी होऊन इमारत उभारताना बनावट कागदपत्रे सादर केल्याने गुरुदेव निवासी इमारत जमीनदोस्त करावी म्हणून पालिकेला निर्देश दिले. मात्र, या विरोधात आरोपींनी न्यायालयात धाव घेतली होती. त्यांनतर २७ जून २०१९ रोजी शांतीनगर पोलीस ठाण्यात तिन्ही आरोपींविरोधात गुन्हा दाखल झाला होता. यामुळे आरोपींनी अंतरिम जामीनसाठी अर्जदेखील केला होता; मात्र ८ ऑगस्ट २०१९ रोजी जिल्हा सत्र न्यायालय ठाणे यांनी आरोपीचा अंतरिम जामीन रद्द केला होता.
जामीन रद्द झाल्यानंतरही या गुन्ह्यातील आरोपींना अटक करण्यासाठी तक्रादार इद्रिस यांनी वारंवार वरिष्ठ पोलीस अधिकाऱ्याकडे तक्रार दिल्या होत्या. अखेर दीड वर्षानी या गुन्ह्यातील दोन आरोपींना शांतीनगर पोलिसांनी अटक केली आहे, तर मुख्य आरोपी भरत सूचक हा फरार असून, पोलीस त्याचा शोध घेत आहेत.