उल्हासनगर : महापालिकेच्या २७ व्या वर्धापनदिना निमित्त सायकल रैलीसह इनडोअर गेमचे आयोजन केले होते. तर शनिवारी सांस्कृतिक व पारितोषिक कार्यक्रमानंतर वर्धापनदिनाचे सांगता करण्यात येणार असल्याची माहिती आयुक्त अजीज शेख यांनी दिली आहे.
उल्हासनगर महापालिकेच्या स्थापनेला २७ वर्ष झाल्याचा निमित्ताने, आयुक्त अजीज शेख, अतिरिक्त आयुक्त जमीर लेंगरेकर, उपायुक्त अशोक नाईकवाडे, सुभाष जाधव आदींनी विविध कार्यक्रमांचे आयोजन केले. सकाळी शांतीनगर वेलकम गेट ते साईबाबा मंदिर डॉ बाबासाहेब आंबेडकर प्रवेशद्वार पर्यंत सायकल रैलीचे आयोजन केले. रैलीला आमदार कुमार आयलानी व आयुक्त अजीज शेख यांनी हिरवा झेंडा दाखविला. तर दुपारी महापालिकेच्या तरण तलाव येथे कॅरम स्पर्धा, बुद्धीबळ स्पर्धा, लिंबू चमचा संगीत खुर्ची आदी स्पर्धेचे आयोजन करून महापालिका अधिकारी व कर्मचाऱ्यांनी यामध्ये सहभाग घेतला.
दुसरीकडे, उल्हासनगर महापालिकेची स्थापना सन-१९९६ साली झाल्यानंतर स्थानिक राजकीय नेत्यांनी शहराचे सिंगापूर करण्याचे स्वप्न नागरिकांना दाखविले होते. प्रत्यक्षात उल्हासनगर मधील उल्हास कधीच निघून गेला असून हजारो नागरिक शेजारील कल्याण, ठाणे, अंबरनाथ, बदलापूर आदी ठिकाणी स्थलांतर करीत आहेत. अनेक व्यापारी इतर शहरात राहण्यास गेले असून व्यापार करण्यासाठी शहरात येतात. तीच परिस्थिती महापालिका अधिकारी, कर्मचारी व माजी नगरसेवकांची आहे. कोट्यवधीचा निधी खर्च करूनही शहरात पाणी टंचाई, सर्वत्र कचऱ्याचे ढीग व दुर्गंधी, रस्त्याची दुरावस्था, २०० बेडचे रुग्णालय उदघाटनाच्या प्रतिक्षेत असतांना, त्याचे खाजगीकरण, महापालिकेत घोटाळ्याची मालिका, अवैध बांधकामांचा सुळसुळाट, शहर विकासाचे कामे ठप्प आहेत. आदी अनेक समस्या शहरा समोर महापालिकेच्या २७ व्या वर्धापनदिनी उभ्या ठाकल्या आहेत. मात्र महापालिका अधिकारी व स्थानिक नेते वर्धापनदिनाची आठवण म्हणून फक्त इव्हेंट करण्यात गुंतल्याची टीका होत आहे.