अग्निशमन दलाने वाचवले १३ वर्षांच्या मुलाचे प्राण

इमारतीच्या लोखंडी प्रवेशद्वारावर खेळताना पाय घसरून प्रवेशद्वाराची लोखंडी टोकदार सळई मनगटात घुसून अडकलेल्या १३ वर्षांच्या मुलाची अग्निशमन दलाच्या जवानांनी सुटका केली.

मीरा रोड : इमारतीच्या लोखंडी प्रवेशद्वारावर खेळताना पाय घसरून प्रवेशद्वाराची लोखंडी टोकदार सळई मनगटात घुसून अडकलेल्या १३ वर्षांच्या मुलाची अग्निशमन दलाच्या जवानांनी सुटका केली. एका बाजूने सळई कापून त्यांनी मुलाची दरवाजातून सुटका केली. पण, सळईचा उर्वरित भाग मनगटातच रुतलेला असल्याने त्याला नजीकच्या रुग्णालयात दाखल करण्यात आले. अभिनव शाळेजवळ सुखसागर इमारत आहे. या इमारतीच्या लोखंडी प्रवेशद्वारावर विश्वास पुजारी (१३) खेळत होता. पाऊस जोरात असल्याने खेळताखेळता तो प्रवेशद्वाराच्या लोखंडी जाळीवरून घसरला आणि जाळीवरील भाल्यासारखी टोकदार सळई विश्वासच्या मनगटात घुसली. सळई आरपार गेल्याने रक्तबंबाळ होऊन विश्वास मदतीसाठी जीवाच्या आकांताने ओरडू लागला. लोक जमले, पण त्याचे सळईत अडकलेले मनगट काढणे अशक्य झाले. पालिकेच्या मुख्य अग्निशमन केंद्रात मदतीसाठी कॉल येताच लीडिंग फायरमन संजय पाटील व अरुण शिर्के काही मिनिटांतच तेथे पोहोचले. मनगटात सळई आरपार गेलेल्या विश्वासचा आकांत पाहून अग्निशमन दलाच्या या दोन्ही जवानांनी क्षणाचीही उसंत न घेता सळई कापण्यास सुरुवात केली. सुमारे १५ मिनिटांच्या प्रयत्नांनी प्रवेशद्वारावरची सळई कापून काढण्यात आली. पण, सळईच्या टोकाकडचा भाग मात्र विश्वासच्या मनगटातून काढणे अशक्य असल्याने रुतलेल्या सळईच्या तुकड्यासह त्याला सिद्धिविनायक रुग्णालयात दाखल करण्यात आले.