लंडन - बाळंतपण झाल्यानंतर वर्षभरातच टेनिस कोर्टवर परतलेल्या सेरेना विल्यम्सला शनिवारी धक्कादायक पराभवाचा सामना करावा लागला. आपल्या चिमुकल्या मुलीपासून दूर राहून ग्रँडस्लॅम स्पर्धेत खेळण्याचा तिचा निर्णय धाडसी होता. पण, तिच्यातल्या आईला सतत आपल्या मुलीची आठवण होत होती. त्यातही जिद्दीने खेळ करत सेरेनाने विम्बल्डनच्या अंतिम फेरीत धडक दिली. पण, तिच्या नशिबात जेतेपदाचा चषक उंचावणे नव्हते. जर्मनीच्या अँजेलिका कर्बरने 6-3, 6-3 अशा फरकाने अवघ्या 1 तास 5 मिनिटांत सुपरमॉम सेरेनाचा स्वप्नभंग केला.