नवी दिल्ली - जागतिक क्रमवारीवर कधीकाळी अव्वल स्थानावर विराजमान असलेली आणि 23 ग्रँड स्लॅम जेतेपद नावावर असलेल्या अमेरिकेच्या सेरेना विल्यम्सला कारकिर्दीत प्रथमच सर्वात वाईट पराभवाचा सामना करावा लागला. सिलिकॉन व्हॅली क्लासिक टेनिस स्पर्धेच्या पहिल्याच फेरीत ब्रिटनच्या जोहाना कोंटाकडून तिला सरळ सेटमध्ये हार मानावी लागली. नुकत्याच पार पडलेल्या विम्बल्डन स्पर्धेनंतर सेरेनाची ही पहिलीच स्पर्धा होती.
मंगळवारी झालेल्या सामन्यात कोंटाने 6-1, 6-0 अशा सरळ सेटमध्ये सेरेनावर विजय मिळवला. 2012पर्यंत ऑस्ट्रेलियाचे प्रतिनिधित्व केलेल्या कोंटाने तीन डब्लूटीए टूर स्पर्धा जिंकल्या आहेत. कोंटाविरूद्धच्या या लढतीत सेरेनाला संघर्ष करावा लागला. अवघ्या 51 मिनिटांत कोंटाने बाजी मारली.