स्मार्ट ग्लासची पाळत; बँक डिटेल्स, खासगी क्षण सर्वकाही कंपनीच्या कर्मचाऱ्यांच्या नजरेत

मेटा कंपनीच्या एआय स्मार्ट ग्लासबाबत स्वीडनच्या वृत्तपत्रांनी केलेल्या खुलाशामुळे जगभरात खळबळ उडाली आहे.

लंडन : मेटा कंपनीच्या एआय स्मार्ट ग्लासबाबत स्वीडनच्या वृत्तपत्रांनी केलेल्या खुलाशामुळे जगभरात खळबळ उडाली आहे. या अहवालानुसार, स्मार्ट ग्लास वापरकर्त्यांनी रेकॉर्ड केलेले अत्यंत वैयक्तिक आणि संवेदनशील व्हिडीओ कंपनीचे कंत्राटी कर्मचारी पाहत असल्याचे समोर आले आहे. 

हे कर्मचारी एआय सिस्टीमला अधिक सक्षम करण्यासाठी डेटा सॉर्टिंगचे काम करतात, परंतु याप्रक्रियेत त्यांना वापरकर्त्यांची बँक खाती, वैयक्तिक माहिती आणि काही आक्षेपार्ह व्हिडीओ देखील पाहावे लागत आहेत. यानंतर ब्रिटनच्या डेटा सुरक्षा संस्थेने मेटाकडे तातडीने अहवाल मागिततला आहे. 

कसे आहेत मेटाचे स्मार्ट ग्लास?

हे चष्मे विविध ब्रँड्सच्या भागीदारीत बनवले गेले असून, याद्वारे वापरकर्ते नोटिफिकेशन पाहू शकतात, पेमेंट करू शकतात, व्हिडीओ रेकॉर्ड करू शकतात व एआय असिस्टंटशी संवाद साधू शकतात. ब्रिटनच्या डेटा सुरक्षा यंत्रणेने मेटाला विचारणा केली असून, वापरकर्त्यांच्या डेटा सुरक्षेबाबत हमी मागितली आहे.

मेटाची भूमिका

या आरोपांनंतर मेटाने स्पष्टीकरण दिले आहे की, कोणताही डेटा कंत्राटी कर्मचाऱ्यांकडे पाठवण्यापूर्वी तो फिल्टर केला जातो. लोकांची प्रायव्हसी सुरक्षित राहावी यासाठी कंपनी कटिबद्ध असल्याचे मेटाने म्हटले आहे, मात्र, समोर आलेल्या अहवालामुळे गोपनीयतेच्या मुद्द्यावर गंभीर प्रश्नचिन्ह निर्माण झाले आहे.

काय आहे प्रकरण?

अहवालात असा दावा केला आहे की, केनियासारख्या देशांमध्ये काम करणाऱ्या कंत्राटी कर्मचाऱ्यांनी असे अनेक व्हिडीओ पाहिले आहेत जे मानसिकदृष्ट्या त्रासदायक होते. अनेकवेळा वापरकर्ते चष्मा काढून ठेवल्यानंतर तो बंद करायला विसरतात, ज्यामुळे काही अत्यंत खासगी व्हिडीओ चुकून रेकॉर्ड होऊन कंपनीच्या सर्व्हरवर जातात. ब्रिटनच्या डेटा सुरक्षा संस्थेने मेटाकडे तातडीने अहवाल मागत कंपनी डेटा सुरक्षा कायद्यांचे पालन करते की नाही, याची चौकशी सुरू केली.