Apple आपल्या आगामी iPhone 13 सीरिजची जोरदार तयारी करत आहे. ही सीरिज 14 सप्टेंबरला सादर केली जाऊ शकते. या सीरिजमध्ये नवीन अपग्रेडसह कंपनी चार आयफोन सादर करू शकते. या सीरिजमध्ये छोटी नॉच, 120Hz रिफ्रेश रेट, Apple A15 प्रोसेसर आणि इतर अनेक बदल बघायला मिळू शकतात. तसेच आता प्रसिद्ध विश्लेषक Ming-Chi Kuo यांनी iPhone 13 सीरिजमधील क्रांतिकारी टेक्नॉलॉजीची माहिती दिली आहे. iPhone 13 स्मार्टफोन्स मॉडेल्समध्ये लो अर्थ ऑर्बिट (LEO) सॅटेलाईट कम्युनिकेशन मोड दिला जाऊ शकतो, असे कुओ यांनी सांगितले आहे.
LEO satellite communication mode म्हणजे काय?
iPhone 13 सीरिजमधील LEO सॅटेलाईट कम्युनिकेशन मोड का आहे क्रांतिकारी? सोप्प्या शब्दांत सांगायचे झाले तर iPhone 13 युजर्सना या मोडमुळे 4G किंवा 5G नेटवर्कविना मेसेज पाठवता येतील, तसेच फोन कॉल्स करता येतील. एखाद्या दुर्गम ठिकाणी गेल्यावर किंवा अश्या ठिकणी राहणाऱ्या लोकांसाठी, तसेच आपत्कालीन परिस्थितीत हा कम्युनिकेशन मोड खूप उपयुक्त ठरू शकतो.
2019 मध्ये झाली होती सुरुवात
Bloomberg ने 2019 मधेच अ‍ॅप्पलच्या टेक्नॉलॉजीची माहिती दिली होती. तेव्हापासून अ‍ॅप्पल सॅटेलाईट टेक्नॉलॉजीचा वापर करून आयफोन्सवर डेटा पाठवण्याचा मार्ग शोधत आहे. परंतु हे फिचर iPhone 13 लाईनअपमध्ये मिळणार, अशी बातमी पहिल्यांदाच समोर आली आहे. भविष्यात हे फिचर अ‍ॅप्पल एअर हेडसेट, अ‍ॅप्पल कार आणि इतर अ‍ॅक्सेसरीजमध्ये मिळू शकते. iPhone 13 मध्ये Qualcomm X60 बेसबँड मॉडेम चिपचे कस्टम व्हर्जन मिळेल. या चिपमुळे सॅटेलाईट कम्युनिकेशन करता येईल, अशी माहिती कुओ यांनी दिली आहे.
फक्त अ‍ॅप्पलच्या iMessage आणि FaceTime सर्व्हिसेस वापरून सॅटेलाईटद्वारे मेसेजस आणि कॉल्स करता येतील कि नाही याची माहिती अजूनतरी स्पष्ट झाली नाही. तसेच जीपीएसप्रमाणे हे फिचर मोफत असेल कि यासाठी वेगळे पैसे द्यावे लागतील, हे देखील समजले नाही. अतापर्यंतचा इतिहास पाहता कंपनी या क्रांतिकारी टेक्नॉलॉजीसाठी पैसे आकारू शकते. तत्पूर्वी हे फिचर आगामी आयफोन्समध्ये मिळणार कि नाही हे आपल्याला 14 सप्टेंबरलाच समजू शकते.