नवी दिल्ली - देशाचे जवान आणि अधिकाऱ्यांना निशाणा बनवणाऱ्या एका नवीन हँकिंग सॉफ्टवेअरचा खुलासा झाला आहे. रिपोर्ट्सनुसार, भारतीय सैन्याचे जवान आणि अधिकाऱ्यांना टार्गेट करणाऱ्या हॅकर्सच्या ग्रुपने CapraRAT नावाचा एक मालवेयर तयार केला आहे. या मालवेयरच्या मदतीने अँड्राईड डिव्हाईसला हॅक करणे शक्य आहे. हा एक Remote Access Trojan (RAT) असून, जो यूजर्सचे लोकेशन, कॉन्टॅक्ट नंबर आणि कॉल हिस्ट्रीसह खासगी माहिती चोरी करू शकतो.
हॅकिंग सॉफ्टवेअरच्या मदतीने हॅकर्स युजर्सच्या फोनचा कॅमेरा आणि मायक्रोफोनला देखील एक्सेस करू शकतात. याच्या मदतीने खासगी माहिती चोरी केली जाऊ शकते. नवीन हॅकिंग टूलचा शोध सायबर सिक्योरिटी फर्म Trend Micro ने लावला आहे. त्यांनी जानेवारी 2020 ते सप्टेंबर 2021 पर्यंतच्या डेटाच्या आधारावर ही माहिती दिली. फर्मने सांगितले की, APT36 हे CapraRAT ला वापरताना आढळले. या ग्रुपला Earth Karkaddan, Operation C-Major, PROJECTM, Mythic Leopard आणि Transparent Tribe च्या नावाने देखील ओळखले जाते.
रिपोर्टनुसार, CapraRAT जवळपास Crimson RAT सारखा आहे, ज्याचा वापर APT36 विंडोज डिव्हाइसला टार्गेट करण्यासाठी केला जातो. दोन्ही मॅलवेयरच्या डिझाईनमध्ये खूप समानता आहे. Crimson RAT प्रमाणेच या मॅलवेयरला देखील टार्गेट यूजरच्या डिव्हाइसमध्ये शिरकाव करण्यासाठी फिशिंग लिंकची मदत घ्यावी लागते. दोन्ही मॅलवेयरमध्ये फंक्शन नेम, कमांड्ससह अनेक गोष्टी समान आहेत. याच कारणामुळे फर्म याला Crimson RAT चे मॉडिफाइड व्हर्जन असल्याचे सांगत आहे.
रिपोर्टनुसार, या मालवेयरला टार्गेट फोनपर्यंत पोहचण्यासाठी बनावट सरकारी कागदपत्रं, हनीट्रॅप अथवा कोरोनाशी संबंधित माहितीचे स्वरुप दिले जाऊ शकते. डाऊनलोड झाल्यानंतर हे इतर एप्सप्रमाणे सिस्टम परमिशन मागतं. त्यानंतर हे सॉफ्टवेअर युजर्सची खासगी माहिती चोरी करू शकतं. या मालवेयरच्या मदतीने हॅकर्स युजर्सच्या फोनचे लोकेशन, कॉल हिस्ट्री, मायक्रोफोनचा एक्सेस आणि ऑडिओ क्लिप रेकॉर्ड करू शकतात. एका हिंदी वेबसाईटने याबाबतचे वृत्त दिले आहे.