कधी काळी फक्त उच्च श्रेणीतील स्मार्टफोनमध्ये असणारे फेस अनलॉक हे फिचर आता किफायतशीर दरातील मॉडेल्समध्येही मिळू लागले आहे. या पार्श्वभूमीवर, लाव्हा झेड ९१ या स्मार्टफोनमध्येही हे फीचर प्रदान करण्यात आले आहे. याचे मूल्य ९,९९९ रूपये असून यासोबत एयरटेल कंपनीने २ हजार रूपयांपर्यंतचा कॅशबॅक देण्याचे जाहीर केले आहे.
लाव्हा झेड ९१ या मॉडेलमध्ये एलईडी फ्लॅश आणि एफ/२.० अपार्चरसह १३ मेगापिक्सल्स क्षमतेचा मुख्य कॅमेरा देण्यात आला आहे. यात बोके इफेक्ट देण्याची सुविधादेखील प्रदान करण्यात आली आहे. तर सेल्फी आणि व्हिडीओ कॉलींगसाठी यात एफ/२.२ अपार्चरयुक्त ८ मेगापिक्सल्सचा कॅमेरा असेल. हा स्मार्टफोन अँड्रॉइडच्या नोगट ७.१ या आवृत्तीपासून विकसित करण्यात आलेल्या स्टार ओएस ४.२ वर चालणारा आहे.
लाव्हा झेड ९१ या स्मार्टफोनमधील दुसरे वैशिष्ट्यपूर्ण फिचर म्हणजे १८:९ गुणोत्तर असणारा आणि फुल व्ह्यू या प्रकारातील डिस्प्ले होय. हा डिस्प्ले ५.७ इंच आकारमानाचा आणि एचडी प्लस म्हणजेच १४४० बाय ७२० पिक्सल्स क्षमतेचा असून यावर २.५ डी वक्राकार ग्लास प्रदान करण्यात आला आहे. यात मीडियाटेक एमटी ६७३९ प्रोसेसर देण्यात आला आहे. याची रॅम ३ जीबी आणि इनबिल्ट स्टोअरेज ३२ जीबी असून ते मायक्रो-एसडी कार्डच्या मदतीने वाढविण्याची सुविधा दिलेली आहे. तर यात ३,००० मिलीअँपिअर क्षमतेची बॅटरी देण्यात आली आहे. यात फोर-जी व्हिओ-एलटीई नेटवर्क सपोर्टसह ब्ल्यू-टुथ, वाय-फाय, जीपीएस, मायक्रो-युएसबी आदी फिचर्स असतील. तर यात फिंगरप्रिंट स्कॅनरसह अॅक्सलेरोमीटर, गायरोस्कोप, ग्रॅव्हीटी, अँबिअंट लाईट सेन्सर्सदेखील प्रदान करण्यात आले आहेत.