विवो कंपनीने तब्बल २४ मेगापिक्सल्स क्षमतेचा फ्रंट कॅमेरा असणार्या विवो व्ही ७ या स्मार्टफोनची एनर्जेटीक ब्ल्यू ही नवीन आवृत्ती भारतीय ग्राहकांना सादर करण्याची घोषणा केली आहे. विवो कंपनीने सप्टेबर महिन्यात विवो व्ही ७ प्लस हा स्मार्टफोन सादर केला होता. याची लघु आवृत्ती नोव्हेंबर महिन्यात विवो व्ही ७ या माध्यमातून ग्राहकांना उपलब्ध करण्यात आली. हे मॉडेल ग्राहकांना १८,९९० रूपयात आणि मॅट ब्लॅक आणि शँपेन गोल्ड या रंगांच्या पर्यायांमध्ये सादर करण्यात आले होते. आता याच मॉडेलची एनर्जेटीक ब्ल्यू या नावाने नवीन आवृत्ती ग्राहकांना सादर करण्यात येणार असल्याचे कंपनीच्या ट्विटर अकाऊंटवरून जाहीर करण्यात आले आहे. २० डिसेंबरपासून ग्राहकांना हा स्मार्टफोन खरेदी करता येणार असल्याचे यात नमूद करण्यात आले आहे. याचे मूल्य जाहीर झाले नसले तरी ते आधीच्या मॉडेलइतकेच असण्याची शक्यता आहे.
विवो व्ही ७ या स्मार्टफोनमध्ये एफ/२.० अपार्चर आणि मूनलाईट ग्लो सेल्फी फ्लॅशयुक्त २४ मेगापिक्सल्सचा फ्रंट कॅमेरा देण्यात आला आहे. हा कॅमेरा या मॉडेलची खासियत मानली जात आहे. तर याचा मुख्य कॅमेरा एफ/२.० अपार्चर आणि ड्युअल एलईडी फ्लॅशयुक्त १६ मेगापिक्सल्स क्षमतेचा असेल. तर विवो व्ही ७ प्लस या स्मार्टफोनमध्ये ५.७ इंच आकारमानाचा आणि एचडी प्लस (१४४० बाय ७२० पिक्सल्स) क्षमतेचा २.५ डी आयपीएस इनसेल फुल व्ह्यू १९:९ गुणोत्तर असणारा डिस्प्ले असून यावर कॉर्नींग गोरीला ग्लास ३ चे संरक्षक आवरण असेल. या मॉडेलमध्ये ऑक्टा-कोअर क्वॉलकॉम स्नॅपड्रॅगन ४५० हा प्रोसेसर असून याची रॅम ४ जीबी आणि इनबिल्ट स्टोअरेज ३२ जीबी आहे. हे स्टोअरेज मायक्रो-एसडी कार्डच्या मदतीने २५६ जीबीपर्यंत वाढविता येणार आहे.
विवो व्ही ७ हा स्मार्टफोन अँड्रॉइडच्या नोगट आवृत्तीवर आधारित फनटच ओएस ३.२वर चालणारा असेल. तर यातील बॅटरी ३,००० मिलिअँपिअर क्षमतेची आहे. यात फोर-जी व्हिओ-एलटीई नेटवर्क सपोर्टसह ब्ल्यू-टुथ, वाय-फाय, जीपीएस, मायक्रो-युएसबी आदी फिचर्स असतील. तर यात अॅक्सलेरोमीटर, गायरोस्कोप, ग्रॅव्हीटी, अँबिअंट लाईट, डिजीटल कंपास आदी सेन्सर्सदेखील असतील.