सांगोला : अज्ञात कारणावरुन अज्ञात इसमाने घरासमोर गाढ झोपेत असलेल्या विधवा महिलेच्या डोक्यात दगड घालून निर्घृण खून केला. ही घटना रविवारी पहाटेच्या सुमारास खिलारवाडी-खोरेमळा (ता. सांगोला) येथे घडली. आशाबाई शरद खांडेकर (वय ३२) असे खून झालेल्या महिलेचे नाव आहे. आशाबाई आपल्या चार मुला-मुलींसमवेत खोरेमळा याठिकाणी राहत होती. शनिवारी नेहमीप्रमाणे आशाबाई खांडेकर हिने जेवण उरकले व घरासमोर मुलांसमवेत झोपली होती. दरम्यान मध्यरात्री १ वाजण्याच्या सुमारास मोठा मुलगा नीलेश हा चुलत्यासमवेत विहिरीवरील मोटार चालू करण्यासाठी शेतात गेला होता. तुषार हा लघुशंकेसाठी उठला असता त्याने आई आई म्हणून आशाबाईस उठविण्याचा प्रयत्न केला असता ती उठत नसल्याने तुषारने बहीण प्राजक्तास उठविले. मात्र बहिणीच्या आवाजालाही आईने प्रतिसाद दिला नाही. तुषार व प्राजक्ताने जवळच राहणार्या आजी सुशीला खांडेकर हिच्याकडे जाऊन आमची आई झोपीतून उठत नसल्याचे सांगितले. यावेळी सासू सुशीला हिने नातवांसमवेत येऊन सून आशाबाईस उठविण्याचा प्रयत्न केला. मात्र तिच्या नाका-तोंडातून रक्तस्त्राव सुरू होता़ बाजूला दगडही पडल्याचे निदर्शनास आले. यावेळी सासूनेच आरडाओरड केल्यामुळे सून आशाबाई हिचा खून झाल्याचे लोकांना समजले. याबाबत भारत कुबेर खांडेकर (रा. खिलारवाडी) याने पोलिसात फिर्याद दिली असून अज्ञात इसमाविरुद्ध गुन्हा नोंद केला आहे.
----------------------------
आशाबाई खांडेकर हिचा निर्घृण खून कोणत्या कारणावरून झाला, याचा तपास सुरु असून या खुनात बाहेरील व्यक्ती नसावी असा पोलिसांचा संशय आहे. त्या अनुषंगाने सर्व बाबी गृहीत धरुन लवकरच या खुनाचा छडा लावला जाईल. - दयानंद गावडे पोलीस निरीक्षक, सांगोला