करमाळा : प्रेयसीचे अनैतिक संबंध दुसरीकडे जुळल्याने चिडून अपघाताचा बनाव रचला खरा, पण पिकअपच्या फुटलेल्या हेडलाइटमुळे अंगलट आला. रविवारी पहाटे वडशिवणे येथे झालेल्या अपघाताचा बनाव पोलिसांनी चोवीस तासांत उघड केला. विजय काकडेच्या खूनप्रकरणी संशयित अक्षय उत्तरेश्वर ढावरे यास पोलिसांनी बेड्या ठोकल्या. रविवारी पहाटे नेहमीप्रमाणे मॉर्निंग वॉकला वडशिवणे येथील शाळेचे शिपाई विजय काकडे (वय ४८) गेले होते. पाचच्या सुमारास एका अनोळखी वाहनाने स्मशानभूमीजवळ त्यांना धडक दिल्याने त्यांचा मृत्यू झाला. या प्रकरणी पोलिसांनी २४ तासांत खुनाचा गुन्हा उघडकीस आणला व विजय काकडेचा अपघात नसून खून झाल्याचे तपासात निष्पन्न झाले. संशयित आरोपी अक्षय ढावरे हा वडशिवणे गावातील सोमनाथ मगर यांच्या (एमएच ४५ टी ९७२२) या पिकअपवर ड्रायव्हर म्हणून काम करत होता. त्याचे एका विवाहितेशी सूत जुळले. काही दिवसांनंतर तिने अक्षयकडे दुर्लक्ष करून विजय काकडे याच्याशी सूत जुळवले. हा राग मनात ठेवून विजयचा काटा काढण्याचे ठरवले व विजय मॉर्निंग वॉकला गेल्यानंतर अपघात घडवून आणला.
---
हेडलाइट फुटल्याने खुनी पोलिसांच्या जाळ्यात...
रविवारी पहाटे विजय काकडे मॉर्निंग वॉकला गेला असता त्याच्या अंगावर पिकअप घातली. त्यात विजयच्या डोक्याला व पायाला गंभीर दुखापत होऊन त्याचा जागीच मृत्यू झाला. पण या धडकेत पिकअपचे समोरील हेडलाइट फुटून घटनास्थळी पडले. फौजदार दिलीप तळपे, नितीन चव्हाण, सागर शेंडगे यांनी तपास करीत असताना आढळून आलेल्या पिकअपची हेडलाइट फुटलेली दिसली. त्यावरून पिकअपच्या मालकाकडे चौकशी केल्यानंतर पिकअप अक्षय ढावरेकडे असल्याची माहिती मिळाली अन् संशयित पकडला गेला.
----
फोटो : मयत विजय काकडे