पंढरपूर : पंढरपूर, सांगोला शहरांना पिण्याचा पाणीपुरवठा करणाऱ्या बंधाऱ्यातील पाणीपातळी प्रत्येक वर्षी उन्हाळ्यात खालावली जाते. यामुळे आंबाबाई मंदिरासमोरील नदीपात्रात असणाऱ्या बंधाऱ्याची उंची व लांबी वाढवण्याबाबत नगरपरिषदेने आरखडा तयार केला आहे. यामुळे भविष्यात पंढरपूर, सांगोला शहरांतील नागरिकांना उन्हाळ्यात पिण्याच्या पाण्याला सामोरे जावे लागणार नाही.
उजनी धरणातून सोडण्यात आलेले पाणी अंबाबाई मंदिरासमोरील नदीपात्रातील कोल्हापूर पद्धतीच्या बंधाऱ्यात अडविण्यात येते. या बंधाऱ्याची उंची तीन मीटर आहे. या बंधाऱ्यातून पंढरपूर, सांगोला शहर व ८१ गावांना पिण्याच्या पाण्याचा पुरवठा केला जातो.
प्रत्येक वर्षी ऐन उन्हाळ्यात बंधाऱ्यातील पाणीपातळी खालवली जाते. यामुळे नगरपरिषदेला शहरात एक व दोन दिवसआड पाणीपुरवठा करावा लागतो. नागरिकांना पिण्याच्या पाण्यासाठी भटकंती करावी लागते.
भीमा नदीला पूर आल्यानंतर बंधाऱ्याचा भराव वाहून गेला होता. यामुळे पंढरपूर नगरपरिषदेने दुरुस्तीचे काम हाती घेतले आहे. बंधाऱ्याची उंची एक मीटर व लांबी १५० मीटरनी वाढवण्याचा विषय नगरपरिषदेचे सर्वसाधारण सभेत मंजूर केला होता. त्यासाठीचा तीन कोटींचा आराखडा तयार झाला असून तो जनरल सभेमध्ये मंजुरीसाठी ठेवण्यात येणार असल्याचे मुख्याधिकारी अनिकेत मानोरकर व पाणीपुरवठा अभियंता आत्माराम जाधव यांनी सांगितले
-----
बंधाऱ्याची सद्य:स्थिती
- लांबी ३३० मीटर
- उंची ३ मीटर
- पाणी साठवण क्षमता १०६ द. श. ल. घनफूट
- एवढे दिवस पाणी पुरते ४५
- बंधाऱ्यात असा होणार बदल
- बंधाऱ्याची लांबी ११० मीटरनी वाढणार
- बंधाऱ्याची उंची १ मीटरनी वाढणार
- पाणी साठवण क्षमता ७० दशलक्ष घनफूट वाढणार
- अधिक २५ दिवस पाणीपुरवठा होईल.
.......................